ရှမ်းပြည်မြောက်ပိုင်း၊ ကျောက်မဲခရိုင်၊ ဟူးဆွန်ကျေးရွာအုပ်စုထဲမှာ RCSS/SSA နဲ့ SSPP/SSA+TNLA တို့ပါတဲ့ တပ်ပေါင်းစုတို့ကြား တိုက်ပွဲဖြစ်နေပြီး  ရွာအနီးမှာ လက်နက် ကျည်ကျလာတာကြောင့် ရွာသားတွေ ရာနဲ့ချီ ထွက်ပြေးတိမ်းရှောင်နေရပါတယ်။ 

မနေ့က တိုက်ပွဲတွေဖြစ်ပွားပြီး လက်နက်ကြီးတွေဟာ  ဟူးဆွန်အုပ်စု နဲမ်းဆိုင်းကျေးရွာနဲ့ ဟူးဆွန်ရွာနားကျလာလို့  သူတို့မနေရဲတော့ကြောင်း ၊ လာကြိုပေးဖို့ အကြောင်းကြားလာတာနဲ့ ဒီက နေ့မနက် ကျောက်မဲမှာရှိတဲ့ ပရဟိတအသင်းအဖွဲ့အကုန်လုံးက ကားအစီးရေ ၃၀ လောက်နဲ့ သွားကြိုခဲ့ကြတယ်လို့ နမ့်ခုံးသာရေးနာရေးအသင်း ဒုဥက္ကဋ္ဌ ဦးစိုင်းလုံက ဒီဗွီဘီကို ပြောပါတယ်။ 

“သူတို့မနေရဲတော့ဘူးဆိုလို့ ကျနော်တို့ကျောက်မဲကရှိသမျှပရဟိတ လူမှုကူညီရေး အသင်းအဖွဲ့တွေ ကျနော်တို့ နမ့်ခုံးအဖွဲ့ရော၊ ကမ့်လင့်လက်များအဖွဲ့၊ ကျောက်မဲနာကူအဖွဲ့ ၊ ဖိုက်စတားအဖွဲ့ စသဖြင့်ပေါ့ ရှိသမျှအကုန်ပါဘဲ ကားအစီးပေါင်း ၂၈ - ၂၉ စီးလောက် သွားကြိုလာကြတယ်။ အဲဒီအုပ်စုက ကျောက်မဲမြောက်ဘက် ၁၅ မိုင်လောက်ဘဲဝေးတယ်ဆိုပေမယ့် တောင်ပေါ်လမ်းဆိုတော့ ခက်ခက်ခဲခဲ သွားရတယ်။ ကားနဲ့တက်လို့မရတဲ့ရွာတွေဆို တောင်ခြေကနေစောင့်ပြီး ခြေလျင်သွားကြိုရတာပေါ့   ”

တိုက်ပွဲရှောင်လာရတဲ့ရွာသားတွေဟာ ဟူးဆွန်ကျေးရွာအုပ်စု ဟူးဆွန် ၊ နဲမ်းဆိုင်း ၊ ပုန်းလုံ ၊ ပုန်းနွဲ့ ၊ ဝမ်တုံ ၊ ကြိမ်ကိုင် ၊ တွန်ဟိတ် စတဲ့ရွာတွေကဖြစ်ပြီး လောလောဆယ် ပထမအသုတ်က လူပေါင်း ၂၀၀ ကျော်ကို မန်ခါကျေးရွာမှာလည်းကောင်း၊ ၃၀၀ ကျော်ကို ကျောက်မဲ ရှမ်းစာပေယဉ်ကျေးမှု အသင်းတိုက်မှာ လည်းကောင်း နေရာချထားပေးပြီး နောက်တ သုတ် ထပ်သွားကြိုနေကာ စုစုပေါင်း ၁၀၀၀ ကျော်မယ်လို့ သူကဆက်ပြောပါတယ်။ 

ကျောက်မဲမြို့နယ်ထဲမှာ ဒီမတိုင်ခင် လွန်ခဲ့တဲ့ ၃ - ၄ လကတည်းက ရောက်နေတဲ့ စစ်ဘေး ရှောင် ၅၀၀ လောက်ကျန်ရှိနေပြီး  အခုနောက်ထပ်ရာနဲ့ချီရောက်လာတဲ့အတွက် အရေးပေါ်စားနပ်ရိက္ခာတွေ လိုအပ်နေလို့ စေတနာရှင်တွေအနေနဲ့ ကျောက်မဲက ပရဟိအသင်းအဖွဲ့တွေဆီ ဆက်သွယ်ကူညီပေးဖို့ ဦးစိုင်းလုံက ပြောပါတယ် ။ 

RCSS/SSA  တပ် နဲ့ SSPP/SSA+TNLA တို့ပါတဲ့ တပ်ပေါင်းစုတို့ဟာ နယ်မြေစိုးမိုးမှုပြဿနာနဲ့ပတ်သက်ပြီး ပြီးခဲ့တဲ့ ဇူလိုင်လဆန်းပိုင်းကစ ဒီကနေ့ထိ ရှမ်းပြည်မြောက်ပိုင်း ကျောက်မဲခရိုင်ထဲမှာရော ရှမ်းပြည်တောင်ပိုင်း မိုင်းကိုင်မြို့နယ်မှာပါ တိုက်ပွဲတွေ မကြခနဖြစ်ပွါးနေတာပါ ။ 

ကျောက်မဲ စစ်ဘေးရှောင်များကူညီနိုင်သော ဖုံးနံပါတ်အချို့ - 

နမ့်ခုံးသာရေးနာရေးအသင်း -  ၀၉ ၇၅၆၈ ၆၆၃၆၆ /  ၀၉ ၇၉၂၄၅၇၉၆၉ / ၀၉ ၇၈၈၁၄၄၁၂၀ / ကျောက်မဲရှမ်းစာပေနှင့်ယဉ်ကျေးမှုအသင်း ၀၉ ၂၅၉၂ ၅၂၀၄၂ / ၀၉ ၆၈၇၆၆၉၃၅၂