ကိုဗစ်-၁၉ ရောဂါပိုး စစ်ဆေးတွေ့ရှိမှုတွေ များလာတာကြောင့် ဒီတစ်ပတ်မှာ ကစားကြမယ့် ပရီးမီးယားလိဂ်ပွဲစဉ် ၄ ပွဲကိုလည်း ထပ်မံရွှေ့ဆိုင်းလိုက်ရပါတယ်။

ညနေ ၇ နာရီ ပွဲစဉ်ဖြစ်တဲ့ မန်ယူနဲ့ ဘရိုက်တန်ပွဲစဉ်ကို ရွှေ့ဆိုင်းခဲ့ပြီးနောက် နောက်ထပ် ပွဲစဉ် ၄ ပွဲကိုလည်း ရွှေ့ဆိုင်းဖို့ ပရီးမီးယားလိဂ်က ဆုံးဖြတ်ခဲ့တာပါ။

ထပ်မံရွှေ့ဆိုင်းတဲ့ပွဲစဉ်တွေက ဆောက်သမ်တန်နဲ့ ဘရိုက်တန်ပွဲစဉ်၊ ဝက်ဖို့ဒ်နဲ့ ခရစ္စတယ်ပဲလေ့ပွဲစဉ်၊ ဝက်စ်ဟမ်းနဲ့ နောဝှစ်ချ်ပွဲစဉ်၊ အဲဗာတန်နဲ့ လက်စတာပွဲစဉ်တွေဖြစ်ပါတယ်။

ပြီးခဲ့တဲ့ တနင်္ဂနွေနေ့က ရွှေ့ဆိုင်းခဲ့တဲ့ ဘရိုက်တန်နဲ့ စပါးပွဲစဉ်ကနေစတင်ပြီး  တစ်ပတ်အတွင်းမှာ စုစုပေါင်း ၉ ပွဲအထိ ပွဲရွှေ့ဆိုင်းခဲ့ရတာပါ။ 

မနေ့ညက ကစားခဲ့တဲ့ ပွဲစဉ် ၂ ပွဲမှာတော့  ချဲလ်ဆီးအသင်းမှာ လူကာကူ၊ အိုဒွိုင်း၊ ဝါနာတို့  ကိုဗစ်ပိုးတွေ့ရှိခဲ့ပေမဲ့ အဲဗာတန်နဲ့ပွဲကို ဆက်ကစားခဲ့ပါတယ်။

အလားတူ လီဗာပူးအသင်းမှာလည်း ဗန်ဒိုက်နဲ့ ဖာဘင်ညိုတို့မှာ ကိုဗစ်ပိုးတွေ့ရှိခဲ့ပေမဲ့ နယူးကာဆယ်နဲ့ပွဲစဉ်ကို ဆက်ကစားခဲ့တာဖြစ်ပါတယ်။

အသင်းအများစုကတော့ ပရီးမီးယားလိဂ်ကို ခေတ္တရပ်နားထားပြီး လာမယ့် ဇန်နဝါရီ ၈ ရက်မှ ပြန်လည်စတင်ဖို့ အဆိုပြုထားကြတယ်လို့ သိရပါတယ်။