အိန္ဒိယအစိုးရဟာ ဇန်နဝါရီ ၃ ရက်ကစပြီး အသက် ၁၅ နှစ်ကနေ ၁၈ နှစ်ကြား ဆယ်ကျော်သက်တွေကို ကိုရိုနာဗိုင်းရပ်စ် ကပ်ရောဂါ ကာကွယ်ဆေး စတင်ထိုးနှံပေးနေပါတယ်။

ဗိုင်းရပ်စ်ရဲ့ အိုမီခရွန် ဗီဇမျိုးကွဲကူးစက်မှုလှိုင်းအသစ်ကို စိုးရိမ်နေကြချိန်မှာ ကမ္ဘာ့ဆယ်ကျော်သက် လူဦးရေ အများဆုံးနိုင်ငံ အိန္ဒိယက ကူးစက်မှု ထိန်းချုပ်ရေးအတွက် ကာကွယ်ဆေးထိုးတဲ့ လှုပ်ရှားမှုတွေကို အမြန်တိုးချဲ့နေပါတယ်။

၂၄ နာရီအတွင်း အသစ်ကူးစက်ခံ လူဦးရေ ၃၃,၇၅၀ ရှိပြီး ကူးစက်ခံ ၁၂၃ ယောက် သေဆုံးခဲ့တယ်လို့ အာဏာပိုင်တွေက တနင်္လာနေ့မှာ အစီရင်ခံပါတယ်။

အိန္ဒိယနိုင်ငံအတွင်း အမြန်ကူးစက်နိုင်တဲ့ အိုမီခရွန်ဗီဇမျိုးကွဲ ကူးစက်ခံဦးရေ စုစုပေါင်း ၁၇၀၀ ရှိပြီလို့ ကျန်းမာရေးဝန်ကြီးဌာနက ပြောပါတယ်။

ပုဂ္ဂလိကနဲ့ ပြည်သူပိုင်ကျောင်းတွေမှာ ကလေးတွေအတွက် ကာကွယ်ဆေးထိုးပေးတဲ့ ဌာနတွေကို တိုးချဲ့ဖွင့်လှစ်နေပြီး ကျောင်းအာဏာပိုင်တွေက ပြည်နယ်အာဏာပိုင်တွေဆီ နေ့စဉ် ကာကွယ်ဆေး ထိုးတဲ့ သတင်းအချက်အလက်တွေကို အစီရင်ခံဖို့ အမိန့်ထုတ်ထားပါတယ်။

ဝန်ကြီးချုပ် နရင်ဒြာမိုဒီရဲ့ ဇာတိပြည်နယ်ဖြစ်တဲ့ ဂူဂျာရတ်ပြည်နယ်က အာဏာပိုင်တွေဟာ ဒီသီတင်းပတ်အတွင်း ကလေး အယောက် ၃ ဒသမ ၆သန်းကို ကာကွယ်ဆေး ပထမထိုးဆေး ထိုးနှံပေးဖို့ မျှော်လင့်ထားပါတယ်။

အမေရိကန်၊ ဗြိတိန်နဲ့ တောင်ကိုရီးယားနိုင်ငံတွေ အပါအဝင် နိုင်ငံအတော်များများမှာ လတ်တလော သီတင်းပတ်တွေအတွင်း ကလေးတွေကြား ကူးစက်မှု ထိုးတက်နေလို့ ကလေးတွေ ကာကွယ်ဆေးထိုးခံကြဖို့ မိဘတွေကို အားပေးနေပါတယ်။

အိန္ဒိယနိုင်ငံမှာ ကလေးဦးရေ ၂၅၃ သန်းရှိလို့ ကမ္ဘာ့ ဆယ်ကျော်သက်ဦးရေ အများဆုံးနိုင်ငံအဖြစ် ကုလသမဂ္ဂ ကလေးများအဖွဲ့ကြီး ယူနီဆက်ဖ်က  ခန့်မှန်းထားပါတယ်။