အမေရိကန်သမ္မတဟောင်း ဒေါ်နယ်ထရမ့်က ၂၀၂၄ ခုနှစ်မှာ သမ္မတဝင်အရွေးခံလို့ အနိုင်ရခဲ့ပါက ဇန်နဝါရီ ၆ ရက် အမေရိကန်ကွန်ဂရက်ကို ဝင်ရောက်တိုက်ခိုက်မှုဖြစ်ရပ်အတွက် တရားစွဲဆိုခံ ထားရသူ ၇၀၀ ကျော်ကို လွတ်ငြိမ်းချမ်းသာခွင့်ပေးမယ်လို့ တက္ကဆက်ပြည်နယ် လူထုအစည်းအဝေးတခုမှာ ကခုန်ပြီး ပြောခဲ့ပါတယ်။

ထရမ့်က “ကျနော်သာ နောက်တကြိမ် ဝင်ပြိုင်ပြီး သမ္မတဖြစ်လာရင် ဇန်နဝါရီ ၆ ရက် တရားစွဲခံထားရသူ အားလုံးကို မျှမျှတတ ဖြေရှင်းပေးသွားမယ်၊ အားလုံးကို လွတ်ငြိမ်းချမ်းသာခွင့် ပေးမယ်၊ အခု အားလုံး မတရားပြုမူဆက်ဆံခံနေရတယ်” လို့ ပြောပါတယ်။

သူက “ဂျိုးဘိုင်ဒင်မှာ အမေရိကန်သမ္မတ အရည်အချင်းမရှိဘူးဆိုတာ လူတိုင်းသိပါတယ်။ ဘိုင်ဒင်ဟာ စွန့်စားရဲသူမဟုတ်ဘူး။ ကျနော်သာ သမ္မတပြန်ဖြစ်ရင် ရုရှားနဲ့ အခုတင်းမာနေတဲ့ ယူကရိန်းပြဿနာ ဘယ်တော့မှဖြစ်မလာဘူး။ ပူတင်နဲ့ ဘယ်တော့မှ ပြဿနာ မဖြစ်စေရဘူး” လို့လည်း ပြောခဲ့ပါတယ်။

အဆိုပါလူထုအစည်းအဝေးမှာ ထရမ့်က သူ့ကို ထောက်ခံသူတွေနဲ့ အချိန်အတော်ကြာ ကပြခဲ့ ပါတယ်။