ကရင်အမျိုးသားအစည်းအရုံး (ကေအန်ယူ) လက်အောက်ခံ KNLA တပ်နဲ့ PDF ပူးပေါင်းတပ်ဖွဲ့က   သထုံခရိုင်မှာ အခြေစိုက်လှုပ်ရှားနေတဲ့ စစ်ကောင်စီတပ်ဖွဲ့ကို  ဖေဖေါ်ဝါရီ ၁၇ ရက်က သွားရောက်ပစ်ခတ်ရာမှာ  စစ်ကောင်စီတပ်သား ၅ ယောက် သေဆုံးပြီး ၄ ယောက် ဒဏ်ရာရသွားတယ်လို့ ကေအန်ယူထံကနေ သိရပါတယ်။

စစ်ကောင်စီတပ်ဖွဲ့တဖွဲ့ဟာ  သထုံခရိုင် ကဒေါ့နီကျေးရွာ ဘုန်းတော်ကြီးကျောင်းကို အကာအကွယ်ယူပြီး လှုပ်ရှားနေတဲ့တပ်ဖွဲ့ဖြစ်ပြီး KNLA တပ်မဟာ(၁) တပ်ရင်း(၂)က အနီးကပ်သွားရောက်ပြီး သံဃာတွေကိုမထိအောင်  ပစ်ခတ်တိုက်ခိုက်ခဲ့တာလို့ KNLA တပ်မှူးက   ပြောပါတယ်။

တိုက်ပွဲဖြစ်ပြီးနောက် စစ်ကောင်စီဘက်က သေဆုံးသူနဲ့ ဒဏ်ရာရှိသူတွေကို သထုံမြို့ဘက်သို့ သယ်ယူပို့ဆောင်သွားကြပြီး KNLA ပူးပေါင်းတပ်ဖွဲ့လည်း ဆုတ်ခွာလာခဲ့တယ်လို့လည်း ဆိုပါတယ်။

ကရင်ပြည်နယ်၊ မြဝတီခရိုင်၊ ကော့ကရိတ်ခရိုင်၊  ဖာပွန်ခရိုင်နဲ့ ညောင်လေးပင်၊ ကျောက်ကြီးဒေသတွေမှာလည်း ညဘက် ၈ နာရီဝန်းကျင်လောက်  စစ်ကောင်စီဘက်ကနေ လက်နက်ကြီးတွေနဲ့ ကျေးရွာတွေဘက်ကို ပစ်ခတ်မှုတွေ ရှိနေပါတယ်။ 

မြဝတီမြို့တောင်ဘက် ဖလူးကျေးရွာမှာတော့ စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် ဖလူးကြီးဒေသခံတစ်ဦး ကျည်စထိမှန်ပြီး ဖေဖေါ်ဝါရီလ ၁၇ ရက်က သေဆုံးသွားတယ်လို့ ရပ်ကျေး ဥက္ကဋ္ဌဟောင်းက ပြောပါတယ်။