ရုရှားက ယူကရိန်းခွဲထွက်ဒေသနှစ်ခုကို တရားဝင်အသိအမှတ်ပြုခဲ့ပြီး တပ်တွေစေလွှတ်ခဲ့တာကြောင့် ရုရှားအပေါ် စီးပွားရေးပိတ်ဆို့မှုအသစ်တွေ စတင်လုပ်ဆောင်သွားမယ်လို့ အမေရိကန်သမ္မတဂျိုးဘိုင်ဒင်က ဖေဖော်ဝါရီ ၂၂ ရက်နေ့မှာ ကြေညာလိုက်ပါတယ်။ 

ရုရှားဘဏ်တွေနဲ့ အစိုးရဘွန်းရောင်းချမှုတွေကို ပစ်မှတ်ထားမယ်လို့ ပြောပါတယ်။ 

ဘိုင်ဒင်က “ပူတင်ဟာ နယ်မြေတွေ ပိုမိုသိမ်းပိုက်ဖို့ တပ်အင်အားတွေ သုံးလာတယ်။ ကျနော်က တုံ့ပြန်တဲ့အနေနဲ့ စီးပွားရေးပိတ်ဆို့မှု အပြင်းထန်ဆုံး လုပ်ဆောင်သွားမယ်။ ၂၀၁၄ မှာ ရုရှားက ခရိုင်းမီးယားဒေသကို သိမ်းပိုက်ခဲ့တုန်းက အမေရိကန်နဲ့ မဟာမိတ်နိုင်ငံတွေ ရုရှားကို စီးပွားရေးပိတ်ဆို့မှု လုပ်ခဲ့တာထက်ကို ပိုပြီး ပြင်းပြင်းထန်ထန် အရေးယူသွားမယ်” လို့ ပြောပါတယ်။ 

ယူကရိန်းခွဲထွက်ဒေသနှစ်ခုဖြစ်တဲ့ ဒိုးနက်စ်နဲ့ လူးဟန့်စ်တို့ကို ရုရှားက လွတ်လပ်တဲ့နိုင်ငံများအဖြစ် အသိအမှတ်ပြုပြီး သမ္မတပူတင်က ငြိမ်းချမ်းရေးထိန်းသိမ်းဖို့ အကြောင်းပြပြီး တပ်တွေစေလွှတ်ခဲ့တာကြောင့် အခုဆယ်စုနှစ်တွေအတွင်း ဥရောပလုံခြုံရေးအတွက် အစိုးရိမ်ရဆုံး အခြေအနေ ဖြစ်နေတာပါ။

ဒေသနှစ်ခုကို ရုရှားတပ်တွေ ဝင်ရောက်လာတာကြောင့် ရက်သတ္တပတ်ပေါင်းများစွာ ကြိုးပမ်းခဲ့တဲ့ သံတမန်ရေးအဖြေရှာမှု မအောင်မြင် ဖြစ်သွားခဲ့ပါတယ်။