အာဖဂန်နစ္စတန်နိုင်ငံထဲက လူသားချင်းစာနာမှုဆိုင်ရာ အကူအညီအတွက် အလှူရှင်နိုင်ငံတွေက အမေရိကန်ဒေါ်လာ ၂ ဒသမ ၄၄ ဘီလီယံ လှူပေးဖို့ ကတိပြုထားတယ်လို့ ကုလ အကြီးတန်း အရာရှိတယောက်က ညီလာခံအပြီး မတ် ၃၁ ရက်မှာ ပြောလိုက်ပါတယ်။

အာဖဂန်ပြည်သူ ၉ သန်းဟာ အငတ်ဘေးနဲ့ ရင်ဆိုင်နေရပြီး မိသားစုတွေဟာ ရှင်သန်နိုင်ရေးအတွက် ကလေးတွေနဲ့ ကိုယ်တွင်းအင်္ဂါ ကလီစာတွေကို ထုတ်ရောင်းနေရတယ်လို့ ကုလအတွင်းရေးမှူးချုပ် အန်တိုနီယို ဂုတားရက်စ်က ပြောရင်း ကန့်သတ်ချက်မဲ့ ရန်ပုံငွေ ထောက်ပံ့ကြဖို့ အလှူရှင်တွေကို မေတ္တာရပ်ခံခဲ့တာပါ။

"အမေရိကန်၊ ဥရောပသမဂ္ဂနဲ့ ဗြိတိန် အပါအဝင် အလှူရှင်နိုင်ငံတွေနဲ့ ဆွေးနွေးပွဲအတွင်း အမေရိကန်ဒေါ်လာ ၂ ဒသမ ၄၄ ဘီလီယံလှူမယ့် ကတိကို ရခဲ့တယ်။ တာလီဘန်တွေက မိန်းကလေးတွေကို အထက်တန်းပညာရေး မရအောင် ငြင်းပယ်တဲ့ ဆုံးဖြတ်ချက်ကို အခိုင်အမာ ပြစ်တင်ရှုတ်ချတယ်" လို့ ကုလ အရေးပေါ် သက်သာ‌ချောင်ချိရေး ညှိနှိုင်းရေးမှူး ဂျွိုက်စ် အမ်စူယာက ကြေညာခဲ့ပါတယ်။