ဘရာဇီးလက်ရွေးစင်အသင်းနည်းပြရာထူးအတွက် မန်စီးတီးနည်းပြ ဂွါဒီယိုလာကို ကမ်းလှမ်း ထားတယ်လို့ သတင်းထွက်ပေါ်နေပါတယ်။ 

နည်းပြဂွါဒီယိုလာဟာ မန်စီးတီးနဲ့ ၂၀၂၃ ခုနှစ်မှာ စာချုပ်သက်တမ်းကုန်ဆုံးမှာဖြစ်ပြီး ဘရာဇီးအသင်းက ခေါ်ယူဖို့ စိတ်ဝင်စားနေတာပါ။

လက်ရှိ ဘရာဇီးနည်းပြ တိထီဟာ ကမ္ဘာ့ဖလားအပြီးမှာ အသင်းနဲ့ လမ်းခွဲမယ်လို့ အတည်ပြုထားတာပါ။ 

ကမ္ဘာ့ဖလားအပြီးမှာ ဘရာဇီးအသင်းနည်းပြရာထူးအတွက် တနှစ်လုပ်ခ ပေါင် ၁ဝ သန်းနဲ့ နည်းပြ ဂွါဒီယိုလာကို ကမ်းလှမ်းထားတယ်လို့ စပိန်သတင်းစာ မာကာက ဖော်ပြပါတယ်။ 

စပိန်နည်းပြဂွါဒီယိုလာဟာ တချိန်မှာ နိုင်ငံအသင်းနဲ့အတူ အတွေ့အကြုံသစ်ရှာဖွေချင်တယ်လို့ ပြောဆိုထားသူပါ။ 

ဘရာဇီးအသင်းနည်းပြ ဖြစ်နိုင်သလားဆိုတဲ့မေးခွန်းအပေါ်မှာ ဘရာဇီးက အမြဲတမ်း ရေးပန်းအစားဆုံးအသင်းဖြစ်ပြီး နှစ်သက်စရာကောင်းတဲ့ အသင်းဖြစ်တယ်လို့ ဂွါဒီယိုလာက ပြောခဲ့ဖူးပါတယ်။ 

ဘရာဇီးဘောလုံးအဖွဲ့ချုပ်ဟာ ၂၀၂၂ ကမ္ဘာ့ဖလားအပြီးမှာ  ၂၀၂၄ ကိုပါအမေရိကဖလားနဲ့ ၂၀၂၆ ကမ္ဘာ့ဖလားတွေအတွက် နည်းပြဂွါဒီယိုလာကို ခန့်အပ်ဖို့ ပြင်ဆင်ထားတာလို့ သိရပါတယ်။ 

ပြီးခဲ့တဲ့လပိုင်းကတော့ ဟော်လန်လက်ရွေးစင်အသင်းကလည်း ဂွါဒီယိုလာကို ခေါ်ယူဖို့ စိတ်ဝင်စားနေတယ်လို့ သတင်းထွက်ခဲ့ဖူးပါတယ်။