မကွေးတိုင်း၊ မြိုင်မြို့နယ်၊ သရက်ကန်ကျေးရွာမှာ အထိုင်ချနေတဲ့ စစ်ကောင်စီစခန်းကို ဒီနေ့ ဧပြီ ၂၉ ရက် မနက် ၅ နာရီက PDF ပူးပေါင်းအဖွဲ့တွေ ဝင်ရောက်တိုက်ခိုက်ခဲ့တယ်လို့ ဒေသခံတွေက ပြောပါတယ်။

မနက်အစောပိုင်းကတည်းက စပစ်ခတ်ကြပြီး အခုလို မပစ်ခတ်ခင် PDF‌ တွေက ရွာသား‌တွေ‌ ဘေးလွတ်ရာ ရှောင်ရှားဖို့ ကြိုတင်သတင်းပေးထားပေမဲ့ မရှောင်သူတွေလည်း ရှိတယ်လို့ ဆိုပါတယ်။

ကျားသစ်နက် ပြောက်ကျားအဖွဲ့ တာဝန်ရှိသူ ကိုဥက္ကာက "ကျနော်တို့ ကာကွယ်ရေးအဖွဲ့တွေ အနေနဲ့ ခုခံစစ်ကနေ ထိုးစစ်ကို ကူးပြောင်းပြီ။ ဒီနေ့ ကျနော်တို့စစ်ကြောင်း တော်လှန်နေတဲ့ ညီနောင်အဖွဲ့တွေနဲ့ သရက်ကန် စစ်ကောင်စီစခန်းကို ဝင်တိုက်ခိုက်ခဲ့ပြီး ရှင်းလင်းနိုင်ခဲ့တယ်။ တိုက်ပွဲပြီးဆုံးသွားတာက မနက်ခင်း ၉ နာရီအချိန်မှာ တိုက်ပွဲပြီးဆုံးခဲ့တယ်ဗျ။ အကျအဆုံးအနေနဲ့ စစ်ကောင်စီဘက်က ၆ ဦး‌သေဆုံးတယ်လို့ ကျနော်တို့မြင်ခဲ့တယ်။တခြား မျက်မြင်ရွာသားတဦး ကျနော်တို့ကို ပြန်ပြောတာတော့ ၅၀ ကျော်လောက် ထိခိုက်ကျဆုံးတာ ရှိတယ်လို့တော့ ပြောတယ်ဗျ။ ကျနော်တို့ဘက်ကတော့ ကျနော်တို့ ကျားသစ်နက်အဖွဲ့က တဦးရယ်၊ တွေ့ရာသင်္ချိုင်း ဓားမဆိုင်းအဖွဲ့က တဦး ကျဆုံးခဲ့တယ်။ ပေါက်မြို့နယ်ဘက်က စစ်ကောင်စီ စစ်ကူလာတာကြောင့် ကျနော်တို့အဖွဲ့တွေ နောက်ဆုတ်ခဲ့ရတယ်" လို့ ပြောပါတယ်။

အခုလို စစ်ကောင်စီကို ပြည်သူ့ကာကွယ်ရေးအဖွဲ့တွေက ခုခံစစ်ကနေ ထိုးစစ်ပြောင်းလာပြီ ဖြစ်တာကြောင့် စစ်ကောင်စီဘက်က စစ်ကိုင်းတိုင်းနဲ့ မကွေးတိုင်းတွေမှာ စစ်သားအင်အား အလုံးအရင်းနဲ့ စေလွှတ်နေတာတွေ ရှိနေပါတယ်။

ဒေသခံတွေကတော့ စစ်ကောင်စီနဲ့ ပြည်သူ့ကာကွယ်ရေးအဖွဲ့တွေ တိုက်ပွဲပြင်းထန်ပြီး အရပ်သား ပြည်သူတွေပေါ် အကြမ်းဖက် နေအိမ်မီးရှို့တာတွေ ပိုမိုလုပ်ဆောင်လာကြမှာကို ဒေသခံတွေက စိုးရိမ်နေကြပါတယ်။

အခု မြိုင်မြို့နယ် သရက်ကန်ကျေးရွာကို ကျားသစ်နက်ပြောက်ကျားအဖွဲ့၊ တွေ့ရာသင်္ချိုင်း ဓားမဆိုင်းအဖွဲ့၊ Future generations အဖွဲ့၊ မြိုင်အနောက်လွင်ပြင်အဖွဲ့၊ မြိုင်ဝါဒီယာအဖွဲ့၊ မြိုင်ဝံပလွေအဖွဲ့နဲ့ မြိုင်ဂဠုန်အဖွဲ့တွေ ပူးပေါင်းတိုက်ခိုက်ခဲ့တာ ဖြစ်တယ်လို့လည်း ကာကွယ်ရေးအဖွဲ့တွေဆီကနေ သိရပါတယ်။

အလားတူ မကွေးတိုင်း ထီးလင်းမြို့နယ်မှာလည်း  ဧပြီ ၂၉ ရက် မနက်က စစ်ကောင်စီတပ်ဖွဲ့နဲ့ YDF ကင်းထောက်တပ်ဖွဲ့တို့ တိုက်ပွဲဖြစ်ပွားခဲ့ပါတယ်။

စစ်ကောင်စီတပ်သားတွေဟာ ဝါးဘိုးချောင်ရွာမှာ နှစ်ညအိပ်ပြီး ထွက်ခွာလာချိန် YDF ကင်းထောက်တပ်ဖွဲ့က ထိပ်တိုက်သွားရောက်တိုက်ခိုက်ခဲ့တယ်လို့ YDF တာဝန်ခံက ပြောပါတယ်။

"တိုက်ခိုက်ပြီးပြီးချင်း အမြန်ဆုတ်ခွာလာခဲ့တာ။ သူတို့ဘက်က ထိခိုက်ကျဆုံးမှု ရှိနိုင်ပေမဲ့ အတည်ပြုလို့ မရခဲ့ဘူး”

တိုက်ပွဲဖြစ်ပွားပြီးနောက် စစ်ကောင်စီတပ်သားတွေဟာ အုန်းတွဲကျေးရွာကို စစ်ကြောင်းထိုး ဝင်ရောက်ကာ ကျေးရွာတွင်းမှာ စခန်းချနေကြတယ်လို့ သိရပါတယ်။

လက်တလော ထီးလင်းမြို့နယ်ထဲမှာ စစ်ကောင်စီတပ်နဲ့ YDF တပ်ကြား အချိန်မရွေး တိုက်ပွဲဖြစ်လာနိုင်တာကြောင့် ထီးလင်း-ဂန့်ဂေါလမ်းကို မသုံးဖို့ ခရီးသွားပြည်သူတွေ ကို YDF ထီးလင်းက အသိပေးထားပါတယ်။