အီကွေဒေါနိုင်ငံမှာ သမ္မတဂီလဲရ်မိုလားဆိုရဲ့ စီးပွားရေးမူဝါဒတွေကို ဆန့်ကျင်ကန့်ကွက်တဲ့ နိုင်ငံတဝန်း ဆန္ဒပြပွဲတွေမှာ အကြမ်းဖက်မှုတွေ ပြင်းထန်လာနေပါတယ်။ 

ဆန္ဒပြသူတွေဟာ  လားဆိုရဲ့ အစိုးရကို အကျင့်ပျက်ခြစားကြောင်း စွပ်စွဲထားတဲ့ ဆိုင်းဘုတ်တွေ ကို ကိုင်ဆောင်ဆန္ဒပြခဲ့ကြတာဖြစ်ပြီး  ဇွန် ၁၅ နဲ့  ၁၆ ရက်  ကွီတိုမြို့လယ်ဆန္ဒပြပွဲတွေမှာတော့ ရဲတွေနဲ့ ထိပ်တိုက် ရင်ဆိုင်ခဲ့ပါတယ်။

“လူနေမှုစရိတ်က ကြောက်စရာကောင်းတယ်။ အခြေခံကုန်ပစ္စည်းတွေကိုတောင် ဝယ်ဖို့ မတတ်နိုင်ဘူး၊ ဈေးတွေ တဟုန်ထိုးတက်သွားတယ်”လို့ ဆန္ဒပြနေတဲ့ ရပ်ကွက်များအသင်း ကိုယ်စားလှယ် ဂျန်နီဇမ်ဘာက  ရိုက်တာကို ပြောပါတယ်။ 

ဇွန် ၁၆ ရက်ညဘက်မှာတော့ သမ္မတ လားဆိုဟာ တိုင်းပြည်ကို မိန့်ခွန်းပြောကြားခဲ့ရာမှာ ဆန္ဒပြပွဲတွေကနေ အကြမ်းဖက်မှုကို ကူးပြောင်းလာတာကိုရပ်တန့်အောင် အစိုးရက အင်အားသုံးဖို့ အဆင်သင့်ဖြစ်နေပြီ ဖြစ်ကြောင်းနဲ့ တွေ့ဆုံဆွေးနွေးရေးလုပ်ဖို့ ဆန္ဒပြသူတွေကို ဖိတ်ခေါ်ထားကြောင်း ထည့်ပြောသွားပါတယ်။ 

ဌာနေတိုင်းရင်းသားအုပ်စုတွေဟာ လက်ရှိဖြစ်ပွားနေတဲ့ ဆန္ဒပြပွဲတွေကို ဇွန် ၁၃ ရက်မှာ စတင်ခဲ့တာဖြစ်ပြီး သမ္မတ လားဆိုကို ဓာတ်ဆီဈေးကို ရပ်တန့်ပေးခိုင်းဖို့ ၊ လယ်သမားငယ်တွေရဲ့ ဘဏ်ကြွေးမြီတွေကို ခဏဆိုင်းငံ့ပေးကြောင်း ကြေညာချက်ထုတ်ပေးဖို့နဲ့ နိုင်ငံမှာ ရေနံနဲ့ သတ္တုတွင်း တိုးချဲ့ခြင်းတွေကို ကန့်သတ်ဖို့တွေ တောင်းဆိုထားပါတယ်။ 

မြို့တော်ကွီတိုမှာ လူ့အဖွဲ့အစည်းတွေနဲ့ ကျောင်းသားအဖွဲ့တွေကလည်း လားဆိုရဲ့ မူဝါဒတွေကို ဆန့်ကျင်ကန့်ကွက် ဆန္ဒပြခဲ့ကြပါတယ်။