နည်းဗျူဟာမြောက် နျူကလီးယားလက်နက်နဲ့ တောင်ကိုရီးယားကို ကျည်မိုးရွာချသလို ပစ်ခတ်ဖို့ ဒီဇိုင်းထုတ်ထားတယ်လို့ မြောက်ကိုရီးယား နိုင်ငံပိုင် သတင်းအေဂျင်စီ KCNA က အောက်တိုဘာ ၁၀ ရက်မှာ ကြေညာပါတယ်။

မြောက်ကိုရီးယားရဲ့  မကြာသေးမီက ဒုံးကျည်စမ်းသပ်မှုဟာ တောင်ကိုးရီးယားနဲ့ အမေရိကန်တပ်ဖွဲ့တွေရဲ့ အကြီးစားရေတပ်လေ့ကျင့်မှုအပြီး သတိပေးချက်အဖြစ် ပြောဆိုလိုက်တာလည်းဖြစ်ပါတယ်။

မြောက်ကိုရီးယားဟာ အောက်တိုဘာလ ၉ ရက် အစောပိုင်းမှာ ပဲ့ထိန်းဒုံးကျည်နှစ်စင်း ပစ်လွှတ်ခဲ့ပြီး စက်တင်ဘာလ ၂၅ ရက်နောက်ပိုင်း သတ္တမမြောက် ဒုံးကျည်ပစ်လွှတ်ခဲ့တာလို့ တောင်ကိုရီးယားနဲ့ ဂျပန် တာဝန်ရှိသူတွေက ပြောပါတယ်။

ခေါင်းဆောင် ကင်ဂျုံအန်းရဲ့ လမ်းညွှန်ချက်နဲ့ လွန်ခဲ့တဲ့ သီတင်းနှစ်ပတ်က နျူကလီးယား စစ်ဆင်ရေး တပ်ဖွဲ့တွေ လေ့ကျင့်ရာမှာ နျူကလီးယား ထိပ်ဖူးတပ်ဆင်နိုင်တဲ့ ပဲ့ထိန်းဒုံးကျည်တွေ ပါတယ်လို့ KCNA က ဖော်ပြခဲ့ပြီး ဒါဟာ ပြင်းထန်တဲ့ သတင်းစကား ပေးပို့တာလို့ KCNA က ပြောပါတယ်။

စမ်းသပ်မှု အမျိုးမျိုးဟာ စစ်ဘက်ကွပ်ကဲမှုဌာနတွေကို ပစ်မှတ်ထားပြီး ပင်မဆိပ်ကမ်းတွေကို တိုက်ခိုက်တာနဲ့တောင်ပိုင်းရှိ လေဆိပ်တွေကို ခြေမှုန်းတာတွေ ပါတယ်လို့ KCNA က ပြောပါတယ်။

လေယာဉ်တင်သင်္ဘောနဲ့ နျူကလီးယားစွမ်းအင်သုံး ရေငုပ်သင်္ဘောအပါအဝင် အမေရိကန်နဲ့ တောင်ကိုရီးယား ရေတပ်တွေရဲ့ ကြီးမားတဲ့စည်းရုံးမှုကို ရှောင်လွှဲလို့မရတဲ့ တုံ့ပြန်မှု အဖြစ် စစ်ရေးလေ့ကျင့်ဖို့ မြောက်ကိုရီးယား အာဏာရ အလုပ်သမားပါတီက ဆုံးဖြတ်ခဲ့တယ်လို့ KCNA က ပြောပါတယ်။

မြောက်ကိုရီးယား အစိုးရက နောက်ထပ် ပဲ့ထိန်းဒုံးကျည်နှစ်စင်း ပစ်လွှတ်ပြီးတဲ့နောက် အမေရိကန်က မြောက်ကိုရီးယားနဲ့ တွေ့ဆုံဆွေးနွေးတာတွေ ပြန်စဖို့ အခြေအနေတွေ ဖန်တီးသင့်တယ်လို့ တရုတ်နိုင်ငံခြားရေးဝန်ကြီးဌာနက အောက်တိုဘာ ၉ ရက်မှာ ပြောပါတယ်။

အခုပစ်လွှတ်မှုဟာ မကြာခင် ရက်တွေအတွင်း ၇ကြိမ်မြောက် ဖြစ်ပြီး အမေရိကန်နဲ့ သူ့ မဟာမိတ်တွေဖြစ်တဲ့ တောင်ကိုရီးယားနဲ့ ဂျပန်တို့မှာ ကျယ်ကျယ်ပြန့်ပြန့် သတိပေးခဲ့ရတာပါ။

အရင်နေ့က တောင်ကိုရီးယားအစိုးရဟာ မြောက်ကိုရီးယားရဲ့ ဗုံးကြဲလေ့ကျင့်မှုကို တုံ့ပြန်တဲ့ အနေနဲ့ တိုက်လေယာဉ်တွေ  ပျံတက်လေ့ကျင့်ခဲ့ပါတယ်။

မြောက်ကိုရီးယားရဲ့ ဒုံးကျည်ပစ်လွှတ်မှုကို တုံ့ပြန်တဲ့အနေနဲ့ အမေရိကန်က ဒဏ်ခတ်ပိတ်ဆို့မှုအသစ်တွေကို သောကြာနေ့က ကြေညာခဲ့ပါတယ်။

မြောက်ကိုရီးယားရဲ့ အိမ်နီးချင်းနဲ့ မဟာမိတ်ဖြစ်တဲ့ တရုတ်နိုင်ငံက တနင်္ဂနွေက ဒုံးကျည်ပစ်လွှတ်တာတွေနဲ့ ပတ်သက်ပြီးမေးတဲ့အခါ အမေရိကန်နှင့် သူ့မဟာမိတ်တွေက ကိုရီးယားကျွန်းဆွယ်တစ်ဝိုက်မှာ ကျင်းပတဲ့ ပူးတွဲစစ်ရေးလေ့ကျင့်မှုကို ထောက်ပြခဲ့ပါတယ်။

"အမေရိကန်ရဲ့ နှုတ်ထွက်စကားဟာ သူ့ရဲ့ လုပ်ရပ်နဲ့ ကိုက်ညီသင့်ပြီး၊ မြောက်ကိုရီးယားအပေါ် မကောင်းတဲ့ သဘောထားမရှိတဲ့ ရပ်တည်ချက်ကို လုပ်ဆောင်ချက်အဖြစ် ပြန်ဆိုသင့်ပါတယ်၊ အဓိပ္ပာယ်ပြည့်ဝတဲ့ တွေ့ဆုံဆွေးနွေးမှု ပြန်စဖို့ အခြေအနေတွေကို ဖန်တီးသင့်ပါတယ်"လို့ တရုတ် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်က ပုံမှန် သတင်းစာရှင်းလင်းပွဲမှာ ပြောခဲ့ပါတယ်။