ကုလသမဂ္ဂ အထွေထွေညီလာခံဟာ အောက်တိုဘာ ၁၂ ရက်က ယူကရိန်းနိုင်ငံရဲ့ နယ်မြေ ၄ ခုထဲက တစိတ်တပိုင်း သိမ်းပိုက်ထားတဲ့ဒေသတွေကို ရုရှားရဲ့ ‘တရားမဝင်သိမ်းပိုက်ရေး ကြိုးပမ်းမှု’ ကို တခဲနက် ရှုတ်ချခဲ့ပါတယ်။

ဒီလုပ်ရပ်ကို နိုင်ငံအားလုံးက အသိအမှတ် မပြုကြဖို့လည်း တောင်းဆိုလိုက်ပြီး အိမ်နီးချင်းနိုင်ငံကို ကျူးကျော်ခဲ့တဲ့အတွက် မော်စကိုကို နိုင်ငံတကာရဲ့ သံတမန်ရေးအရ ဝိုင်းပယ်မှုကို အားကောင်းစေပါတယ်။

အဖွဲ့ဝင် ၁၉၃ နိုင်ငံ ပါဝင်တဲ့ အထွေထွေညီလာခံရဲ့ ၄ ပုံ ၃ ပုံဖြစ်တဲ့ နိုင်ငံပေါင်း ၁၄၃ နိုင်ငံက ညီလာခံဆုံးဖြတ်ချက်ကို ထောက်ခံမဲပေးခဲ့ကြပြီး နိုင်ငံတကာက အသိအမှတ်ပြုထားတဲ့ နယ်နိမိတ်အတွင်းမှာ ယူကရိန်းရဲ့ အချုပ်အခြာအာဏာ၊ လွတ်လပ်ရေး၊ စည်းလုံးညီညွတ်မှုနဲ့ ပိုင်နက်နယ်မြေ ဂုဏ်သိက္ခာကိုလည်း ထပ်မံအတည်ပြုခဲ့ပါတယ်။

ယူကရိန်းနိုင်ငံဆိုင်ရာ ကုလသမဂ္ဂ သံအမတ်ကြီး Sergiy Kyslytsya က “ဒါဟာ အံ့သြစရာကောင်းပါတယ်” လို့ မဲခွဲဆုံးဖြတ်အပြီးမှာ သတင်းထောက်တွေကို ပြောပါတယ်။

ဒီရလဒ်ဟာ ရုရှားအနေနဲ့ ကမ္ဘာကို မခြိမ်းခြောက်နိုင်ဘူးဆိုတာ ပြလိုက်တာပဲလို့ ကုလသမဂ္ဂဆိုင်ရာ အမေရိကန်သံအမတ် လင်ဒါ သောမတ်စ် ဂရင်းဖီးလ်ဒ်က ပြောကြားခဲ့ပါတယ်။

ဒီမဲခွဲဆုံးဖြတ်မှုမှာ ဆီးရီးယား၊ နီကာရာဂွာ၊ မြောက်ကိုရီးယားနဲ့ ဘီလာရုစ်တို့က ဆန့်ကျင်မဲပေးတဲ့ ၄ နိုင်ငံဖြစ်ပြီး ရုရှားရဲ့ မဟာဗျူဟာမိတ်ဘက် တရုတ်နိုင်ငံ အပါအဝင် တခြား ၃၅ နိုင်ငံက မဲမပေးခဲ့ကြပါဘူး။

ပြီးခဲ့တဲ့လက အဖွဲ့ဝင် ၁၅ နိုင်ငံပါ လုံခြုံရေးကောင်စီမှာ အလားတူ ဆုံးဖြတ်ချက်ကို ရုရှားက ဗီတိုအာဏာသုံးပြီး ပယ်ချခဲ့ပြီးနောက် မနေ့က အထွေထွေညီလာခံမှာ မဲခွဲဆုံးဖြတ်ခဲ့တာ ဖြစ်ပါတယ်။