ကရင်ပြည်နယ်၊ မြဝတီမြို့၊  အမှတ် ၁ ရပ်ကွက်၊ မြန်မာ-ထိုင်းချစ်ကြည်ရေးအမှတ် ၁ တံတားအနီး အောက်တိုဘာ ၁၅ ရက် ည ၇ နာရီလောက်က ဗုံးပေါက်ကွဲမှုဖြစ်ပွားခဲ့ပါတယ်။

မြဝတီမြို့၊ ဘုရင့်နောင်လမ်း၊ မီးမီးလေးစတိုးဆိုင်အရှေ့ဘက်မှာ ဗုံးတလုံးပေါက်ကွဲခဲ့တာဖြစ်ပြီး ဗုံးပေါက်ကွဲမှုကြောင့် လမ်းဘေးမှာရပ်ထားတဲ့ မော်တော်ကား တစီး မီးလောင်သွားတယ်လို့ မျက်မြင်တွေ့တဲ့ မြို့ခံတဦးကပြောပါတယ်။

အဆိုပါဗုံးပေါက်ကွဲမှုကြောင့်  လူတွေထိခိုက်သေဆုံးမှုရှိမရှိ  အသေးစိတ်မသိရသေးပါဘူး။  မြဝတီမြို့မှာ အောက်တိုဘာ ၁၅ ရက် ညနေက နေရာ  ၃ နေရာလောက်မှာ ဗုံးပေါက်ကွဲခဲ့တာဖြစ်ပြီး ဗုံးဖောက်ခွဲသူတွေကိုတော့ ဖမ်းဆီးနိုင်ခြင်းမရှိသေးဘူးလို့ ဒေသခံတွေက ပြောပါတယ်။

မြဝတီမြို့မှာ ဧပြီ ၂၃ ရက်ညကလည်း အမှတ် ၁ ချစ်ကြည်ရေးတံတားထိပ်မှာ အပြင်းစား ဗုံးပေါက်ကွဲမှုဖြစ်ပွားခဲ့ပြီး အနီးနားက  အဆောက်အဦတွေနဲ့ မော်တော်ယာဉ်တွေ ပျက်စီးခဲ့ပါတယ်။