မြောက်ကိုရီးယားက ရုရှားကို လက်နက်ထောက်ပံ့မှုရှိမရှိ အမေရိကန်စောင့်ကြည့်နေ
အမေရိကန်ဟာ ယူကရိန်းစစ်ပွဲအတွက် ရုရှားကို မြောက်ကိုရီးယားက ‘အမြောက်ကျည်ဆန်တွေ’ လျှို့ဝှက်ထောက်ပံ့မှုကို အနီးကပ်စောင့်ကြည့်နေကြောင်း ပင်တဂွန် သတင်းပြန်ကြားရေးအရာရှိ ဗိုလ်မှူးချုပ် ပတ်ရိုင်ဒါက နိုဝင်ဘာ ၈ ရက်မှာ သတင်းထောက်တွေကို ပြောပါတယ်။
“နိုင်ငံတော်လုံခြုံရေးကောင်စီ NSC က ပြောတာထက်ပိုပြီးတော့ ဘာသတင်းအသစ်မှ ပြောဖို့မရှိကြောင်း၊ ကျနော်တို့မှာရှိထားတဲ့ အချက်အလက်က မြောက်ကိုရီးယားက ရုရှားကို အမြောက်လက်နက်တွေ အမြောက်အမြား လျှို့ဝှက်ထောက်ပံ့ပေးနေပြီး အဲဒီအခြေအနေကို ဆက်ပြီး စောင့်ကြည့်နေမှာဖြစ်ကြောင်း” ရိုင်ဒါက သတင်းထောက်တွေကို ပြောပါတယ်။
ဒီတင်ပို့မှုတွေကို ရုရှားနိုင်ငံက လက်ခံရယူခြင်း ရှိ၊ မရှိ မှတ်ချက်ပေးဖို့ကိုတော့ ငြင်းဆိုခဲ့ပါတယ်။
ပြီးခဲ့တဲ့သီတင်းပတ်က အိမ်ဖြူတော် အမျိုးသားလုံခြုံရေး ပြောရေးဆိုခွင့်ရှိသူ ဂျွန်ကာဘီက မြောက်ကိုရီးယားဟာ အရှေ့အလယ်ပိုင်းနဲ့ မြောက်အာဖရိကရှိ နိုင်ငံတွေကတဆင့် လမ်းကြောင်းထွင် ပေးပို့တာတွေကို ဖုံးကွယ်ဖို့ ကြိုးစားနေပြီး ဒီတင်ပို့မှုတွေကို လက်ခံရယူခြင်း ရှိ မရှိ ဝါရှင်တန်ကလည်း စောင့်ကြည့်နေကြောင်း ပြောကြားခဲ့ပါတယ်။
ဒီသတင်းအပေါ် မြောက်ကိုရီးယားကလည်း ရုရှားနိုင်ငံနဲ့ ဘာလက်နက်သဘောတူညီမှုမှ မရှိကြောင်း အင်္ဂါနေ့က ငြင်းဆိုခဲ့ပြီး နောင်လည်း ဒီလိုလုပ်ဖို့ အစီအစဉ်မရှိကြောင်း နိုင်ငံပိုင်မီဒီယာက ဖော်ပြခဲ့ပါတယ်။
