မြောက်ကိုရီးယားဟာ ဒီဇင်ဘာ ၂၃ ရက်က အရှေ့ဘက်ကို အနည်းဆုံး ပဲ့ထိန်းဒုံးကျည်တစင်း ပစ်လွှတ်ခဲ့ပြီးနောက်မှာ ဂျပန်နိုင်ငံက သံတမန်ရေးအရ ကန့်ကွက်မှုတရပ်ကို တောင်းဆိုလိုက်ကြောင်း ဂျပန်နိုင်ငံရဲ့ ဒုတိယကာကွယ်ရေးဝန်ကြီး တိုရှီရို အီနိုက တိုကျိုမှာ သတင်းထောက်တွေကို ပြောပါတယ်။

ဒုံးကျည်ကို မြောက်ကိုရီးယားနိုင်ငံ မြို့တော် ပြုံယမ်းအနီးကနေ အရှေ့ဘက်ကို ဒေသစံတော်ချိန် ညနေ ၄ နာရီခွဲလောက်မှာ ပစ်လွှတ်ခဲ့တာဖြစ်ပြီး အမြင့်ဆုံး အမြင့်ပေ ၅၀ ကီလိုမီတာလောက်ကနေ ကီလိုမီတာ ၃၀၀ အကွာအဝေးထိ ပျံသန်းခဲ့ကြောင်း အီနိုက ပြောပါတယ်။

မြောက်ကိုရီးယားရဲ့ အရှိန်အဟုန်ပြင်းပြင်းနဲ့ ဒေါသတကြီး ပြုမူမှုတွေက ဂျပန်နိုင်ငံ ဒေသတွင်းနဲ့ နိုင်ငံတကာ အသိုက်အဝန်းရဲ့ ငြိမ်းချမ်းရေးနဲ့ လုံခြုံရေးကို ခြိမ်းခြောက်နေတာဖြစ်ပြီး သည်းခံနေလို့ မရတော့ဘူးလို့ အီနိုက ဆိုပါတယ်။

ဂျပန်နိုင်ငံဟာ ပေကျင်းမှာရှိတဲ့ ဂျပန်သံရုံးကနေတဆင့် မြောက်ကိုရီးယားကို ပြင်းပြင်းထန်ထန် ကန့်ကွက်ဆန္ဒပြခဲ့ပြီး သူတို့ရဲ့လုပ်ရပ်ကို ပြင်းပြင်းထန်ထန် ရှုတ်ချပါတယ်လို့ ဂျပန် ဒုတိယကာကွယ်ရေးဝန်ကြီးက ပြောပါတယ်။

မြောက်ကိုရီးယားဟာ နိုင်ငံတကာက ပိတ်ဆို့အရေးယူမှုတွေ ရှိနေပေမဲ့ အမေရိကန်ပြည်မကြီးကို ရောက်ရှိနိုင်တဲ့ တိုက်ချင်းပစ်ဒုံးကျည် (ICBM) အပါအဝင် အခုနှစ်အတွင်း မကြုံစဘူး ဒုံးကျည်စမ်းသပ်မှု အများအပြား ပြုလုပ်ခဲ့တာပါ။

နိုဝင်ဘာလက မြောက်ကိုရီးယားဟာ အမေရိကန်ပြည်မကြီးကို ရောက်ရှိနိုင်လောက်တဲ့ တိုက်ချင်းပစ်ဒုံးကျည်ကို စမ်းသပ်ပစ်ခတ်ခဲ့ပြီး ဂျပန်နိုင်ငံနဲ့ ကီလိုမီတာ ၂၀၀ မှာ ကျရောက်ခဲ့ပါတယ်။