ဆိပ်ဖြူတွင် စစ်ကောင်စီတပ် ပစ်ခတ်မှုကြောင့် ၁၂ နှစ်အရွယ် မိန်းကလေးငယ် ၁ ဦး သေဆုံး
မကွေးတိုင်း၊ ဆိပ်ဖြူမြို့နယ်၊ ထမ္မကောက်ရွာမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေက ဇန်နဝါရီ ၁ ရက်နေ့မှာ လက်နက်ငယ်နဲ့ ရမ်းပစ်ခတ်တာကြောင့် ထင်းခွေနေသူ အသက် ၁၂ နှစ်အရွယ် မိန်းကလေးတဦး ထိမှန်သေဆုံးခဲ့တယ်လို့ ကျေးရွာဒေသခံတွေဆီက သိရပါတယ်။
ထမ္မကောက်ရွာမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို ဇန်နဝါရီ ၁ ရက် မနက်ပိုင်းက ပြည်သူ့ကာကွယ်ရေးတပ်ဖွဲ့ဝင်တွေ ဒရုန်းနဲ့ ဗုံးကြဲတိုက်ခိုက်ခဲ့ရာမှာ စစ်တပ်က ပြန်ပစ်ခတ်တဲ့ကျည် ထိမှန်ခဲ့တာလို့ ပြည်သူ့ကာကွယ်ရေးတပ်ဖွဲ့ဝင်တဦးက ပြောပါတယ်။
“ရွာရဲ့ အနောက်တောင်ဘက်က တောင်ကုန်းပေါ် သားအဖသုံးယောက် ထင်းခွေသွားရာ အမြင်မရှင်းလို့ ပစ်လိုက်တာတဲ့။ သူ့အဖေက စစ်မှုထမ်းဟောင်းပါ။ စစ်သားတွေကို ထမင်းဟင်း ချက်ကျွေးတာ။ သူတို့ဗိုလ်ကြီးက ရွာကိုပြန်သယ်ပြီး သင်္ဂြိုဟ်ခိုင်းတယ်လို့ သိရပါတယ်။”
ပစ်ခတ်ခံရသူဟာ အသက် ၁၂ နှစ်အရွယ် အမျိုးသမီးတဦးဖြစ်ပြီး ဖခင်ဖြစ်သူ ဦးမြင့်ထွန်းအောင်က စစ်မှုထမ်းဟောင်းတဦး ဖြစ်တယ်လို့ သိရပါတယ်။
ဆိပ်ဖြူမြို့နယ် ရေထွက်ကျေးရွာက စစ်ရှောင်အမျိုးသားတဦးကိုလည်း ဒီဇင်ဘာ ၂၈ ရက်နေ့မှာ စစ်ကောင်စီတပ်ဖွဲ့ဝင်တွေ ပစ်ခတ်ခဲ့တာကြောင့် သေဆုံးခဲ့တယ်လို့ သိရပါတယ်။
