တရုတ်နိုင်ငံ၏ ကိုဗစ် အချက်အလက် အမှန်ကို ကိုယ်စားပြုမှုနည်းဟု WHO ပြော
တရုတ်နိုင်ငံရဲ့ ကိုဗစ်-၁၉ ဒေတာဟာ အခြေအနေကို တိတိကျကျ ပုံမဖော်ဘဲ ရောဂါကြောင့် ဆေးရုံတက်နေရသူနဲ့ သေဆုံးမှုအရေအတွက်ကို ကိုယ်စားပြုမှု နည်းပါးတယ်လို့ ကမ္ဘာ့ကျန်းမာရေးအဖွဲ့ အရေးပေါ်အခြေအနေဆိုင်ရာ ညွှန်ကြားရေးမှူး မိုက်ခ် ရိုင်ယန်က ဇန်နဝါရီ ၄ ရက် သတင်းစာရှင်းလင်းပွဲမှာ ပြောပါတယ်။
ကမ္ဘာ့ ကိုဗစ်-၁၉ အခြေအနေနဲ့ ပတ်သက်ပြီး အဖွဲ့ဝင်နိုင်ငံတွေကြား ကျယ်ကျယ်ပြန့်ပြန့် ရှင်းလင်းညွှန်ကြားတဲ့ အစည်းအဝေး တစိတ်တပိုင်းအနေနဲ့ ဇန်နဝါရီ ၅ ရက်မှာ ကုလသမဂ္ဂ အေဂျင်စီက တရုတ်သိပ္ပံပညာရှင်တွေနဲ့ ထပ်တွေ့ဆုံဖို့ ပြင်ဆင်နေချိန်မှာ အခုလို မှတ်ချက်ပေးခဲ့တာပါ။
“တရုတ်နိုင်ငံမှာ ထုတ်ဝေနေတဲ့ လက်ရှိကိန်းဂဏန်းတွေဟာ ဆေးရုံတက်ခွင့်၊ ICU ဝင်ခွင့်၊ အထူးသဖြင့် သေဆုံးမှုမှာ ရောဂါရဲ့သက်ရောက်မှု အမှန်ကို ကိုယ်စားပြုနိုင်တာ နည်းတယ်လို့ ကျွန်ုပ်တို့ယုံကြည်တယ်” လို့ သူက ဆက်ပြောခဲ့ပါတယ်။
တရုတ်နိုင်ငံမှာ ကိုဗစ်-၁၉ ကူးစက်မှု မြင့်တက်လာတဲ့အတွက် စိုးရိမ်မိတယ်လို့ သတင်းစာရှင်းလင်းပွဲ အစောပိုင်းမှာ WHO ညွှန်ကြားရေးမှူးချုပ် တေဒရို အဒါနွန် ဂေဘရီယေးဆပ်က ထပ်လောင်းပြောကြားခဲ့ပြီး ဆေးရုံတက်ကုသတာနဲ့ သေဆုံးခြင်းဆိုင်ရာ အချက်အလက်တွေကို အမြန်နဲ့ ပုံမှန်ပေးပို့ဖို့ တရုတ်အစိုးရကို ထပ်ပြီး တိုက်တွန်းခဲ့ပါတယ်။
“ပိုမြန်ဆန်၊ ပုံမှန်၊ ယုံကြည်စိတ်ချရတဲ့ ဆေးရုံတင်ရခြင်းနဲ့ သေဆုံးခြင်းဆိုင်ရာ ဒေတာတွေအပြင် ပိုပြည့်စုံပြီး အချိန်နှင့်တပြေးညီ ဗိုင်းရပ်စ်ဆိုင်ရာ စိစစ်ခြင်းအတွက် တရုတ်ကို ကျွန်ုပ်တို့ ဆက်တောင်းဆိုနေပါတယ်” လို့ သူက သတင်းစာရှင်းလင်းပွဲမှာ ပြောပါတယ်။
