အချိန်စောသေးတဲ့အတွက် ဆုဖလားရယူဖို့ စဉ်းစားထားခြင်းမရှိသေးကြောင်း မန်ယူနည်းပြ တန်ဟတ်ဂ်ကပြောသွားပါတယ်။

ယူနိုက်တက်နဲ့ ပထမဆုံးရာသီမှာ ဆုဖလားတစ်ခုခုရယူ နိုင်ဖို့  ချိန်ရွယ်ထားသလားဆိုတဲ့ မေးခွန်းအပေါ် နည်းပြတန်ဟတ်ဂ်ကပြန်လည်ဖြေကြားခဲ့တာပါ။   ပွဲစဉ်တွေအများကြီး ကစားရဖို့ရှိသေးတာကြောင့် အပေါင်းလက္ခဏာဆောင်တဲ့ အခြေအနေတွေကလွဲရင် ဆုဖလားရယူနိုင်ဖို့ မတွေးနိုင်သေးကြောင်း၊ တချိန်တည်းမှာပဲ တိုးတက်လာရမယ့် အစိတ်အပိုင်းတွေ ကျန်ရှိသေးကြောင်း နည်းပြတန်ဟတ်ဂ်ကပြောပါတယ်။

မန်ယူအသင်းဟာ ပြိုင်ပွဲစုံမှာ ၆ ပွဲဆက်တိုက်အနိုင်ရထားပြီး စနေနေ့မှာ အဲဗာတန်နဲ့ အက်ဖ်အေဖလားရှုံးထွက်ပွဲစဉ်ကို အိုးထရတ်ဖို့ဒ် အိမ်ကွင်းမှာ လက်ခံကစားသွားရမှာဖြစ်ပါတယ်။