ဖီဖာကမ္ဘာ့ကလပ်ဖလားပြိုင်ပွဲ ဗိုလ်လုပွဲမှာ စပိန်ရီးရဲလ်မက်ဒရစ်အသင်းဟာ ဆော်ဒီကလပ် အယ်ဟီလော်ကို ၅ ဂိုး  ၃ ဂိုးနဲ့ အနိုင်ရသွားပါတယ်။

စနေနေ့က မော်ရိုကိုမှာ ယှဉ်ပြိုင်သွားတဲ့ ဥရောပချန်ပီယံ ရီရဲလ်မက်ဒရစ်နဲ့ အာရှကလပ် ချန်ပီယံ ဆော်ဒီကလပ်အယ်ဟီလော်တို့ ပွဲစဉ်မှာ သွင်းဂိုး  ၈ ဂိုးအထိ  သွင်းယူနိုင်ခဲ့ပါတယ်။

ဆော်ဒီကလပ် အယ်ဟီလော်အသင်းဟာ ဆီမီးဖိုင်နယ်တုန်းက ဘရာဇီးကလပ် ဖလာမင်ဂိုကို အနိုင်ယူပြီး ဗိုလ်လုပွဲကို ပထမဆုံး တက်ရောက်နိုင်တဲ့ ဆော်ဒီအသင်းအဖြစ် မှတ်တမ်း ဝင်ခဲ့ပါတယ်။

ဗိုလ်လုပွဲမှာ ရီးရဲလ်အတွက် အနိုင်ဂိုးတွေကို ဗီနီဆီးရပ်စ် ဂျူနီယာ၊ ဗယ်ဗါဒီနဲ့ ဘန်ဇီမာတို့က သွင်းယူခဲ့တာပါ။ ဒီပွဲမှာ ရီးရဲလ်အသင်းက တဖက်သတ် ဘောလုံးပိုင်ဆိုင်မှု အသာစီးယူ ကစားနိုင်ခဲ့သလို ဂိုးပေါက် ကန်သွင်းခွင့်လည်း ပိုရခဲ့တာပါ။

နည်းပြ အန်စလော့တီရဲ့ ရီးရဲလ်မက်ဒရစ်အသင်းဟာ ကမ္ဘာ့ကလပ်ဖလားပြိုင်ပွဲမှာ စံချိန်တင် ၅ ကြိမ်မြောက် ချန်ပီယံဆုကို ဆွတ်ခူးနိုင်တာ ဖြစ်ပါတယ်။