ယူကရိန်းနဲ့ ရုရှားအကြား နောက်ဆုံးစစ်ရေးအခြေအနေအဖြစ် ရုရှားက ယူကရိန်းတပ်ဖွဲ့တွေ၊ လက်နက်ခဲယမ်း သိုလှောင်ရုံတွေ၊ တိုက်လေယာဉ်တွေနဲ့ စစ်ဘက်ဆိုင်ရာပစ္စည်းတွေကို နည်းလမ်းပေါင်းစုံကနေ တိုက်ခိုက်ခဲ့တယ်လို့ ဖေဖော်ဝါရီ ၂၅ ရက်မှာ ပြောပါတယ်။

ယူကရိန်းပိုင် ကူပျန့်စ်ခ်နဲ့ ကရာစနီ၊ လိုင်းမန်းမြို့တွေမှာ ဘက်ပေါင်းစုံက ရုရှားထိုးစစ်တွေကြောင့် ယူကရိန်းလက်နက်ကိုင်တပ်ဖွဲ့ (AFU) ရဲ့ လူအင်အားနဲ့ စစ်လက်နက်ပစ္စည်းတွေ ထိခိုက်ပျက်စီးခဲ့တယ်လို့ နေ့စဉ်သတင်းစာရှင်းလင်းပွဲအတွင်း ရုရှားကာကွယ်ရေးဝန်ကြီးဌာန ပြောရေးဆိုခွင့်ရှိသူ အီဂေါ ကိုနာရှန်ကော့ဗ်က ဖေဖော်ဝါရီ ၂၅ ရက်မှာ ပြောပါတယ်။

ယူကရိန်းရဲ့ ဒွန်ညက်ခ်နဲ့ ဇာပိုရိုရှေ ဒေသတွေမှာလည်း ရုရှားစစ်တပ်က ယူကရိန်း လက်နက်ခဲယမ်း ဂိုဒေါင်တွေကို တိုက်ခိုက်ခဲ့တဲ့အပြင် ခါဆွန်မြို့မှာလည်း ယူကရိန်းပိုင် အမေရိကန်နိုင်ငံထုတ် M777 ဟောင်ဝစ်ဇာအမြောက်တွေကို ဖျက်ဆီးခဲ့ပါတယ်။

ဒွန်ညက်ခ်နဲ့ ခါဆွန်ဒေသက ယူကရိန်းတိုက်လေယာဉ် အများအပြားကိုပါ ရုရှားလေကြောင်း တပ်ဖွဲ့နဲ့ လေကြောင်းကာကွယ်ရေးအဖွဲ့တွေက ပစ်ချနိုင်ခဲ့တယ်လို့လည်း ဆိုပါတယ်။

အဲဒီတရက်တည်းမှာပဲ ယူကရိန်းလက်နက်ကိုင်တပ်ဖွဲ့ (AFU) ရဲ့ စစ်ဦးစီးချုပ်က ယူကရိန်း လေတပ်အနေနဲ့ ရုရှားစစ်မှုထမ်းတွေနဲ့ လက်နက်တွေအပြင် ရေဒါစခန်းတွေကိုပါ တိုက်ခိုက်နိုင်ခဲ့တယ်လို့ အခိုင်အမာ ပြောပါတယ်။

ရုရှားဘက်က တိုက်ခိုက်လာမှုတွေကို ယူကရိန်းစစ်တပ်က နယ်ပယ်ပေါင်းစုံကနေ တန်ပြန် ချေမှုန်းနိုင်ခဲ့တယ်လို့လည်း စစ်ဦးစီးချုပ်ဖြစ်သူက အဲဒီနေ့ အစောပိုင်းမှာ တုံ့ပြန် ပြောဆိုပါတယ်။