ထိုင်ဝမ်ကို လက်နက်တွေပေးပို့မှု အရှိန်တိုးမြှင့်ဖို့အတွက် ဖြစ်နိုင်သမျှ အရာအားလုံးကို လုပ်ဆောင် နေကြောင်း အမေရိကန်အကြီးတန်းလွှတ်တော်အမတ် မိုက်ကယ်မက်ကောလ်က ဧပြီ ၇ ရက်မှာ ပြောကြားလိုက်ပါတယ်။ 

ရုရှားကျူးကျော်မှုကို ခုခံကာကွယ်ဖို့အတွက် အမေရိကန်က ယူကရိန်းကို ထောက်ပံ့ရေး ပစ္စည်းတွေ လွှဲပြောင်းပေးနေတာကြောင့် ထိုင်ဝမ်ဟာ မနှစ်ကတည်းက စတင်ဂါ လေယာဉ် ပစ်ဒုံးပျံတွေလို အမေရိကန်လက်နက်တွေပေးပို့ရာမှာ နှောင့်နှေးမှုတွေအပေါ် မကျေမနပ် ဖြစ်နေတာပါ။ 

လက်နက်ပို့ဆောင်မှုကိစ္စမှာ လက်မှတ်ထိုးပြီးတော့ ဒါကို အရှိန်မြှင့်ဖို့ အစွမ်းကုန်လုပ်ဆောင် နေကြောင်းနဲ့ ထိုင်ဝမ်အတွက် အဟန့်အတားတွေ ပံ့ပိုးပေးဖို့၊ ဒေသတွင်း ငြိမ်းချမ်းရေးကို မြှင့်တင်ဖို့အတွက် ကျယ်ကျယ်ပြန့်ပြန့် သဘောတူညီမှုရထားပြီလို့ ထင်မြင်ကြောင်းလည်း မက်ကောလ်က ပြောပါတယ်။ 

သူတို့လည်း ငြိမ်းချမ်းရေးနဲ့ သာယာဝပြောရေးကို လိုလားပြီး အလွန်ရန်လိုတဲ့ ကွန်မြူနစ် တရုတ်နိုင်ငံကို ဒီလှပတဲ့ ကျွန်းနိုင်ငံကို ကမ်းစပ်မှာ ခြေချဖို့ကိုတောင် မတွေးစေဖို့ တတ်နိုင်သမျှ လုပ်ဆောင်ပေးချင်တာလို့လည်း မက်ကောလ်က တိုင်ပေမှာပြုလုပ်တဲ့ သတင်းစာရှင်းလင်းပွဲမှာ ပြောဆိုပါတယ်။ 

အမေရိကန်အကြီးတန်းလွှတ်တော်အမတ် မိုက်ကယ် မက်ကောလ်ဟာ အမေရိကန် လွှတ်တော် အမတ်တွေရဲ့ ကိုယ်စားလှယ်အဖွဲ့ကို ဦးဆောင်ပြီး ၃ ရက်ကြာခရီးစဉ်အဖြစ် ထိုင်ဝမ်ကျွန်းက ထိုင်ပေကို ရောက်ရှိနေခဲ့တာပါ။

အလားတူ သတင်းစာရှင်းလင်းပွဲမှာ ထိုင်ဝမ်ပါလီမန်လွှတ်တော်ဥက္ကဋ္ဌ ယူစီကွန်း က "တကယ်တော့ တရုတ်ဟာ နိုင်ငံတကာစင်မြင့်မှာ ထိုင်ဝမ်ကို ပိုပြီးမြင်သာအောင်နဲ့ နိုင်ငံတကာ ပုံရိပ်မှာလည်း မြှင့်တင်အောင် ထိုင်ဝမ်ကို ကူညီပေးနေတာဖြစ်လို့ ရှီကျင့်ဖျင်ကိုတောင် ကျေးဇူးတင်ရပါဦးမယ်”လို့ ရယ်မောပြောဆိုလိုက်ပါတယ်။ 

“ပူတင်ဟာ ယူကရိန်းကို အရသာရှိတဲ့ အစားအစာ ဖြစ်မယ်လို့ပဲတွေးပြီး ယူကရိန်းက ငါးအရိုးလို ဖြစ်မယ်လို့ ထင်မထားခဲ့ဘူး။ ငါးကို ကိုက်စားလိုက်တာနဲ့ သူ့လည်ချောင်းမှာ ကပ်စူးနေတော့ အခု မျိုချလို့လည်းမရ ထွေးထုတ်လို့လည်းမရ ဖြစ်နေတာကြောင့် ရှီကျင့်ဖျင်ကို သူ့အစောင့် လုပ်ခိုင်းလိုက်တာ”လို့  ယူစီကွန်းက ပြောပါတယ်။