အီရန်က ပင်လယ်ကွေ့ဒေသမှာ စစ်ရေးလေ့ကျင့်မှုများလုပ်နေစဉ် တာဝေးပစ်ဒုံးကျည်တွေ ပစ်လွှတ်ပြီး အစ္စရေးကို သတိပေးလိုက်ပါတယ်။ 

အီရန်နျူကလီးယား တည်ဆောက်မယ့်နေရာတွေကို အစ္စရေးက တိုက်ခိုက်လာနိုင်တဲ့ စိုးရိမ်မှုတွေ ဖြစ်ပေါ်ပြီးနောက် အခုလို ဒုံးကျည်တွေပစ်ခတ် သတိပေးခဲ့တာပါ။

အီရန်ဗိုလ်ချုပ် ဟူစိန် ဆလာမီက “အခု စစ်ရေးလေ့ကျင့်မှုတွေကနေ ပေးချင်တဲ့မက်ဆေ့ချ်က ရှင်းရှင်းလေးပါ၊ အစ္စရေးကို ရည်ရွယ်တာပါ” လို့ ပြောပါတယ်။

အီရန်က အဆင့်အတန်းအမျိုးမျိုးရှိတဲ့ တာဝေးပစ်ဒုံးကျည် ၁၆ ခုကို တပြိုင်တည်းပစ်လွှတ်ပြီး ကြိုတင် သတ်မှတ်ထားတဲ့  ပစ်မှတ်တွေကို ဖျက်ဆီးပြနိုင်ခဲ့ပါတယ်။ 

ဒုံးကျည်တွေက ကီလိုမီတာ ၂၀၀၀၀ (မိုင် ၁၂၀၀) အဝေးထိရောက်ပြီး ပင်လယ်ကွေ့ဒေသတွင်းရှိ ရန်သူ အစ္စရေးနဲ့ အမေရိကန် စစ်စခန်းတွေကို ပစ်ခတ်နိုင်စွမ်း ရှိပါတယ်။

မကြာခင်က အမေရိကန်နဲ့ ကမ္ဘာ့အင်အားကြီးတွေက အီရန်နဲ့ နျူကလီးယားအရေး ဆွေးနွေးမှုတွေ ပြန်စဖို့ စီစဉ်နေပေမဲ့ အစ္စရေးက မကြိုဆိုပါဘူး။  အဲဒီသံတမန်ရေးကြိုးပမ်းမှုတွေ  ပျက်သွားရင် စစ်ရေးတိုက်ခိုက်မှု ရှိလာမယ်လို့ အီရန်ကို ခြိမ်းခြောက်ထားပါတယ်။ 

အစ္စရေးကာကွယ်ရေးဝန်ကြီး ဘန်နီဂန့်ဇ်က ကမ္ဘာ့နိုင်ငံတွေကို အီရန်နဲ့ဆွေးနွေးရာမှာ စစ်ရေး လေ့ကျင့်မှုတွေ ခွင့်မပြုဖို့ ပြောခိုင်းထားပါတယ်။

အီရန်ဘက်ကတော့  ဒေသငြိမ်းချမ်းရေးအတွက် နျူကလီးယားတည်ဆောက်တာလို့ ပြောပါတယ်။  အစ္စရေးကလည်း အရှေ့အလယ်ပိုင်းမှာ နျူကလီးယားပိုင်ဆိုင်တဲ့ တခုတည်းသောနိုင်ငံအဖြစ်သာ လိုလားပါတယ်။