အရှေ့ဥရောပမှာ ကိုရိုနာဗိုင်းရပ်စ်ကြောင့် သေဆုံးသူ ၁  သန်းကျော်သွားပြီး၊   အိုမီခရွန် မျိုးကွဲဗိုင်းရပ်စ်က အဲဒီနိုင်ငံတွေကို နောက်ထပ်ခြိမ်းခြောက်လာနေတယ်လို့ ရိုက်တာသတင်းက ဖော်ပြပါတယ်။

ဥရောပတိုက်မှာ ကိုဗစ်ကြောင့် နေ့စဉ်သေဆုံးမှု အမြင့်ဆုံး ငါးနိုင်ငံအနက် သုံးနိုင်ငံက အရှေ့ဥရောပနိုင်ငံတွေဖြစ်ပြီး ရုရှား၊ ပိုလန်၊ ယူကရိန်းတို့ ဖြစ်ပါတယ်။ 

ဒီဇင်ဘာ ၂၉ ရက် စာရင်းတွေအရ  ပိုလန်မှာ  ကိုဗစ် စတုတ္ထလှိုင်းဝင်နေပြီး သေဆုံးမှု စံချိန်တင် မြင့်တက်နေပါတယ်။ 

အနောက်ဥရောပနိုင်ငံတွေနဲ့ယှဉ်ရင် ပိုလန်မှာ ကာကွယ်ဆေးထိုးမှု နည်းသလို  ကျန်းမာရေးကုသမှု မနိုင်မနင်းတွေ ဖြစ်နေတာကြောင့် သေဆုံးမှုနှုန်းတက်နေတာလို့ ပိုလန်သမားတော်ကြီးတဦးက ပြောပါတယ်။   

ဒီဇင်ဘာ ၃၀ ရက်နေ့ စာရင်းအရ ရုရှားက ကိုဗစ်ရောဂါနဲ့သေဆုံးမှု  တကမ္ဘာလုံးမှာ ဒုတိယဖြစ်လာပြီး ဘရာဇီးကို ကျော်တက်သွားပါတယ်။ 

အမေရိကန်ပြည်ထောင်စုနောက်က ကပ်လိုက်နေပါတယ်။ ယူကရိန်းက ကာကွယ်ဆေးထိုးမှု ကမ္ဘာ့အနည်းဆုံးနိုင်ငံ တစ်နိုင်ငံဖြစ်ပြီး၊ ပထမအကြိမ်ထိုးပြီးသူ လူဦးရေရဲ့ ၃၃ ရာခိုင်နှုန်းပဲ ရှိပါတယ်။

အရှေ့ဥရောပမှာ ကာကွယ်ဆေးထိုးမှု အမြင့်ဆုံးနိုင်ငံတွေက ချက်သမ္မတနိုင်ငံနဲ့ ဟန်ဂေရီတို့ ဖြစ်ပြီး၊ လူဦးရေရဲ့ ၆၄ ရာခိုင်နှုန်းက အနည်းဆုံး တကြိမ် ထိုးပြီးခဲ့ပါပြီ။