ယူကရိန်း စစ်တပ်ဟာ အမေရိကန် လက်နက်တွေနဲ့ စစ်ရေးလေ့ကျင့်မှုကို ဖေဖော်ဝါရီ ၄ ရက်က ယူကရိန်းနိုင်ငံ အရှေ့ပိုင်းဒေသမှာ ပြုလုပ်ခဲ့ပါတယ်။ 

ယူဘောရီစစ်စခန်းမှာ ပြုလုပ်တဲ့ စစ်ရေးလေ့ကျင့်မှုမှာ တင့်ကားဖျက် ဒုံးလက်နက်တွေ၊ တာဝေးပစ် လောင်ချာတွေနဲ့ တခြား လက်နက်ကြီးတွေ ပါဝင်ပါတယ်။

ဒီစစ်မြေပြင်သုံးယာဉ်တွေနဲ့ လက်နက်တွေဟာ အမေရိကန်က ယူကရိန်းကို ထောက်ပံ့ပေးထားတဲ့ ဒေါ်လာ သန်း ၂၀၀ တန်ဖိုးရှိတဲ့ အကူအညီရဲ့ အစိတ်အပိုင်း ဖြစ်ပါတယ်။ 

ရုရှားရဲ့ ကျူးကျော်မှုကို စိုးရိမ်နေရတဲ့ ယူကရိန်းကို ဆက်လက် ထောက်ပံ့ပေးသွားဖို့ အမေရိကန် ပြည်ထောင်စုက ကတိပြုထားပါတယ်။ 

ရုရှားဟာ ယူကရိန်းနယ်စပ်မှာ တပ်အင်အား ထောင်နဲ့ချီ ပို့ထားတဲ့အတွက် ယူကရိန်းကို ကျူးကျော်မှာကို အမေရိကန်နဲ့ အနောက်မဟာမိတ်တွေက စိုးရိမ်မှုတွေ ရှိနေပေမယ့် ရုရှားကတော့ စစ်ရေးအရ ဒီလို ရန်စတာမျိုး လုပ်မှာ မဟုတ်ဘူးလို့ ပြောထားပါတယ်။

အလားတူ ရုရှားနိုင်ငံ တောင်ဘက်ပိုင်း ယူကရိန်းနဲ့နယ်စပ်မှာလည်း ရုရှားတပ်ဟာ တင့်ကားအပါအဝင် တိုက်ခိုက်ရေး ယာဉ်တွေကို အသုံးပြုပြီး စစ်ရေးလေ့ကျင့်မှုကို ဖေဖော်ဝါရီ ၃ ရက်က ပြုလုပ်ခဲ့ပါတယ်။

ဒီလေ့ကျင့်မှုထဲမှာ ရုရှားစစ်သားတွေဟာ တိုက်ခိုက်ရေးယာဉ်တွေကို ခရီးကြမ်းမှာ အရှိန်ပြင်းပြင်း မောင်းနှင်တာ၊ ရန်သူကို အသာစီးက နေရာယူ ပစ်ခတ်နိုင်မယ့် လေ့ကျင့်ခန်းတွေကို ပါဝင်တယ်လို့ ရုရှားကာကွယ်ရေးဝန်ကြီးဌာနက ဆိုပါတယ်။ 

ယူကရိန်းနယ်စပ်မှာ ရုရှားတပ်တွေ တိုးမြှင့်ချထားချိန် ရုရှားတပ်ရဲ့ ဒီလို လှုပ်ရှားမှုတွေကို အနောက်နိုင်ငံတွေက အနီးကပ် စောင့်ကြည့်နေပါတယ်။ 

ရုရှားဟာ ယူကရိန်းနယ်စပ်မှာ တပ်အင်အား တိုးချထားသလို၊ ယူကရိန်းနဲ့ နယ်စပ်ဖြစ်တဲ့ ဘီလာရု နိုင်ငံဘက်ကိုလည်း တပ်နဲ့ လက်နက်တွေကို ပို့နေတာပါ။ 

ဒါဟာ ဖေဖော်ဝါရီ ၁၀ ရက်ကနေ ၂၀ ရက်အထိ ပြုလုပ်မယ့် စစ်ရေး လေ့ကျင့်မှုအတွက် ဖြစ်ပြီး လေ့ကျင့်မှု ပြီးသွားတဲ့အခါ တပ်တွေကို ပြန်ရုပ်မယ်လို့ ရုရှားက ပြောထားပါတယ်။ 

ရုရှားကာကွယ်ရေးဝန်ကြီး ဆာဂျီရွှိုင်းဂူ Sergei Shoigu ဟာ ဖေဖော်ဝါရီ ၃ ရက်က ဘီလာရုနိုင်ငံကို ရောက်သွားပြီး နှစ်နိုင်ငံတပ်တွေ စစ်ရေးလေ့ကျင့်မှုအတွက် ပြင်ဆင်နေတာကို စစ်ဆေးခဲ့သလို ဘီလာရုသမ္မတ လူကာရှန်ကိုနဲ့ တွေ့ဆုံခဲ့ပါတယ်။

ရုရှားဟာ ယူကရိန်းကို ကျူးကျော်တော့မယ်ဆိုတဲ့ စွပ်စွဲချက်တွေကို ငြင်းဆိုထားပြီး အမေရိကန်နဲ့ နေတိုးဘက်က ယူကရိန်းကို စစ်ရေးမဟာမိတ်အဖွဲ့ဝင်နိုင်ငံအဖြစ် မထည့်သွင်းဖို့ အာမခံချက်ကို တောင်းဆိုနေပါတယ်။