ဘီလာရုဇ်နိုင်ငံ နေရာတခုမှာ ရုရှားတင့်ကားတွေနဲ့ တိုက်လေယာဉ်တွေ အပြင်းအထန် စစ်ရေးလေ့ကျင့်ပြီး ဒုံးကျည်တွေပစ်လွှတ်နေတဲ့ ဗွီဒီယိုဖိုင်ကို ရုရှားကာကွယ်ရေးဝန်ကြီးဌာနက ဖေဖော်ဝါရီ ၁၀ ရက်နေ့မှာ ထုတ်လွှင့်ခဲ့ပါတယ်။ 

အဲဒီနေ့မှာပဲ ရုရှားကာကွယ်ရေးဝန်ကြီးနဲ့ ဗြိတိန်ကာကွယ်ရေးဝန်ကြီးတို့ မော်စကိုမြို့မှာ တွေ့ဆုံပြီး ယူကရိန်းအရေးကို သံတမန်နည်းလမ်းသစ်နဲ့အဖြေရှာဖို့ ဆွေးနွေးနေပါတယ်။

ဘီလာရုဇ်မှာ ရုရှားတပ်ဖွဲ့ဝင် ၃၀,၀၀၀  ချထားတဲ့အပြင် Spetsnaz အထူးစစ်ဆင်ရေးတပ်ဖွဲ့တွေ၊ SU-35 တိုက်လေယာဉ်တွေ၊ S-400 လေကြောင်းရန်ကာကွယ်ရေးစနစ်နဲ့ နျူကလီးယားပစ်လွှတ်နိုင်သော Iskander ဒုံးကျည်တွေလည်း ပါဝင်တယ်လို့  နေတိုးတပ်ဖွဲ့ အထွေထွေအတွင်းရေးမှူး ယန်းစ် စတိုလ်တန်ဘာ့ဂ်က ပြောပါတယ်။

ဘီလာရုဇ်ရဲ့ ရုရှားနဲ့ပူးတွဲ စစ်ရေးလေ့ကျင့်မှုတွေကို စောင့်ကြည့်နေတဲ့ ယူကရိန်းကလည်း အားကျမခံ ဖေဖော်ဝါရီ ၂၀ ရက်မှာ စစ်ရေးလေ့ကျင့်မှုတွေ လုပ်သွားမယ်လို့ ကြေညာထားတာပါ။

ယူကရိန်းဟာ အနောက်နိုင်ငံတွေက ပို့ပေးထားတဲ့ Bayraktar ဒရုန်းတွေနဲ့ NLAW တင့်ကားဖျက်ဒုံးကျည်တွေကို အသုံးပြု လေ့ကျင့်မှာဖြစ်ပြီး နောက်ထပ် အမေရိကန်စစ်လက်နက်အကူအညီတွေ အခုရက်ပိုင်း ရောက်ရှိလာမှာပါ။