ထိုင်းနိုင်ငံမြောက်ပိုင်း၊ ချင်းမိုင်မြို့မှာ ပြီးခဲ့တဲ့ ၂၄ နာရီအတွင်း ကိုဗစ်-၁၉ ကူးစက်မှု အသစ် ၃၀၀၀ ကျော် ရှိခဲ့တယ်လို့ ဘန်ကောက်ပို့စ်သတင်းမှာ ဖော်ပြပါတယ်။

ပိုးတွေ့လူနာတွေထဲက ၃၆၁ ‌ယောက်ကတော့ RT-PCR စစ်ဆေးမှုနဲ့ တွေ့ရှိခဲ့တာဖြစ်ပြီး ၂,၇၂၂ ယောက်ကတော့ Antigen စစ်ဆေးမှုနဲ့ တွေ့ရှိခဲ့တာလို့ ထိုင်းကူးစက်ရောဂါဆိုင်ရာ ကော်မတီက ပြောပါတယ်။

ပိုးတွေ့လူနာသစ် ၃,၀၈၃ ထဲမှာတော့ အများစုက အိုမီခရွန်ပိုးတွေ့လူနာတွေဖြစ်ပြီး သေဆုံးသူ ၁ ယောက်ရှိခဲ့တယ်လို့ ဆိုပါတယ်။

ခုလိုကူးစက်မှုတွေဟာ လုပ်ငန်းခွင်တွေ၊ ဆေးရုံတွေ၊ ဈေးတွေ၊ ရွှေ့ပြောင်းအလုပ်သမားစခန်းတွေ၊ စားသောက်ဆိုင်တွေစတဲ့ လူစုလူဝေးများတဲ့ နေရာတွေမှာ အစုလိုက်အပြုံလိုက် ကူးစက်မှုတွေ များခဲ့တယ်လို့ ဆိုပါတယ်။

အသက် ၁၅ နှစ်ကနေ ၂၅ နှစ်ကြား အပိုင်းအခြားကတော့ ကူးစက်မှု အမြင့်ဆုံးဖြစ်ပြီး သူ့ နောက်မှာတော့ ၂၅ နှစ်ကနေ ၃၅ နှစ်ကြားဖြစ်ကာ ၁၅ နှစ်အောက် ကူးစက်မှုနှုန်းကတော့ လျော့ကျသွားခဲ့တယ်လို့ ဆိုပါတယ်။

အခုနှစ်အတွင်း ချင်းမိုင်မှာ ကိုဗစ်-၁၉ ရောဂါကူးစက်ခံရသူပေါင်းကတော့ ၁၀,၇၄၇ ယောက်ထိ ရှိနေတာ ဖြစ်ပါတယ်။