တိုက်စစ်မှူး ရက်ရှ်ဖို့ဒ် ပုံမှန်ခြေစွမ်းပြန်လည်ရရှိနိုင်ဖို့အတွက် အစွမ်းကုန် ကူညီပေးသွားမယ်လို့ မန်ယူနည်းပြ ရန်းနစ်ခ်က ပြောပါတယ်။ 

အသက် ၂၄ နှစ်ရှိ အင်္ဂလန်တိုက်စစ်မှူးဟာ  အသင်းမှာ ပုံမှန်ပွဲထွက်ခွင့်ရဖို့တောင်ရုန်းကန်နေရပြီး  နောက်ဆုံး ၆ ပွဲဆက်တိုက် ဂိုးပေါက်ပျောက်ခဲ့ပါတယ်။ 

ပရီးမီးယားလိဂ် ၁၇ ပွဲမှာတော့ ၄ ဂိုးသွင်းယူထားပြီး အရင်လို ခြေစွမ်းကောင်း ပြန်ရဖို့အတွက် ကူညီပေးသွားမယ်လို့ နည်းပြရန်းနစ်ခ်က ပြောပါတယ်။ 

“မားကပ်မှာ အရည်အချင်းတွေ အများကြီးပိုင်ဆိုင်ထားတယ်။ လျင်မြန်တယ်၊ ကြံ့ခိုင်မှုကောင်းတယ်။ ခေတ်သစ် တိုက်စစ်မှူး တစ်ယောက်မှာရှိသင့်ရှိထိုက်တဲ့ အရည်အချင်းတွေရှိတယ်။ သူဘယ်နေရာမှာပဲ ကစားရသည်ဖြစ်စေ ကိစ္စမရှိပါဘူး။ ပြီးခဲ့တဲ့ ၃ လအတွင်းမှာ တခြားကစားသမားတွေကို တွန်းတင်နိုင်ခဲ့တဲ့ ပုံစံအတိုင်း သူ့ကိုလည်း အစွမ်းကုန်ကူညီပေးသွားမှာပါ။”

ယူနိုက်တက်မှာ လူငယ်တောင်ပံကစားသမား အီလန်ဂါ ခြေစွမ်းပြနေတာကြောင့် မားကပ်ရက်ရှ်ဖို့ဒ်တစ်ယောက် ပုံမှန်ပွဲထွက်ခွင့်ရဖို့ ရုန်းကန်နေရတာဖြစ်ပါတယ်။