ကချင်ပြည်နယ်တစ်ခုလုံးမှာ အခုနှစ် တက္ကသိုလ် ဝင်တန်းစာမေးပွဲဖြေဆိုမယ့် ကျောင်းသားကျောင်းသူပေါင်း ၁၂၀၀၀ ကျော်ရှိပြီး ပြီးခဲ့တဲ့နှစ်တွေကထက် ကျောင်းသားဦးရေ ထက်ဝက်ကျော် လျော့နည်းသွားတယ်လို့ ပညာရေးဝန်ထမ်းတွေက ပြောပါတယ်။

၂၀၂၁-၂၀၂၂ ပညာသင်နှစ် တက္ကသိုလ်ဝင်တန်း စာမေးပွဲမှာ ကချင်ပြည်နယ်အတွင်း စာမေးပွဲဖြေဆိုမယ့် ကျောင်းသားကျောင်းသူ ၁၂,၀၀၀ ကျော်ရှိပြီး ပြီးခဲ့တဲ့ ၂၀၁၉-၂၀၂၀ ခု ပညာသင်နှစ်မှာ တက္ကသိုလ်ဝင်တန်းဖြေဆိုခဲ့တဲ့ ကျောင်းသားကျောင်းသူ  ၃၆,၀၀၀ နီးပါးရှိခဲ့တာ ဖြစ်ပါတယ်။

ကချင်ပြည်နယ် ပညာရေးဝန်ထမ်းတဦးက “ဒီနှစ်ကတော့ စာမေးပွဲဖြေဆိုမယ့်သူတွေ ယခင်နှစ်တွေထက် ထက်ဝက်ကျော်လောက် လျော့သွားတယ်။ တပြည်နယ်လုံးမှာမှ တက္ကသိုလ်ဝင်တန်း ဖြေမယ့်သူ တစ်သောင်းကျော်ပဲရှိတယ်"လို့ ပြောပါတယ်။

၂၀၂၁-၂၀၂၂ပညာသင်နှစ် တက္ကသိုလ်ဝင်တန်းစာမေးပွဲ ဖြေဆိုမယ့် ကျောင်းသား၊ ကျောင်းသူတွေအတွက် စာမေးပွဲ ဖြေဆိုခွင့် ကတ်တွေကို တချို့ကျောင်းတွေမှာ စတင်ထုတ်ပေးနေပါတယ်။

“မြစ်ကြီးနားခရိုင်က စာမေးပွဲဖြေဆိုမယ့်သူ အများဆုံးပဲ၊ ပူတာအိုခရိုင်က အနည်းဆုံးပဲ။ အခု စာမေးပွဲ ဖြေဆိုခွင့်ကတ်တွေ တချို့ကျောင်းတွေမှာ ထုတ်ပးနေပြီ” လို့ ပညာရေးဝန်ထမ်းက ပြောပါတယ်။

စစ်ကောင်စီလက်အောက်ခံ ပညာရေးဝန်ကြီးဌာနက မတ် ၃၁ ရက်မှ ဧပြီ ၉ ရက်အထိ  တက္ကသိုလ်ဝင်တန်းစာမေးပွဲတွေ နိုင်ငံတဝန်းကျင်းပဖို့ ရှိနေပြီး စစ်ကျွန်ပညာရေးကို ဆန့်ကျင်သပိတ်မှောက်တဲ့ ကျောင်းသူ ကျောင်းသားတွေကတော့ ဝင်ရောက် ဖြေဆိုခြင်းမ ရှိပါဘူး။

အမျိုးသားညီညွတ်ရေးအစိုးရ (NUG) ကလည်း စစ်ကောင်စီက စီစဉ်ကျင်းပတဲ့ ဒီစာမေးပွဲကို အသိအမှတ် မပြုဘူးလို့ ကြေညာထားပါတယ်။