ယူကရိန်းအပေါ် ကျူးကျော်တိုက်ခိုက်မှုကို တုံ့ပြန်တဲ့အနေနဲ့ ရုရှားရဲ့ ရေနံနဲ့ တခြားစွမ်းအင်တင်ပို့မှုကို လုံးဝ ပိတ်ပင်တားမြစ်ဖို့ အမေရိကန်အောက်လွှတ်တော်က ၄၁၄ မဲ- ၁၇ မဲနဲ့ ဥပဒေ အတည်ပြုလိုက်ပါတယ်။ 

ရီပတ်ဗလင်ကင်အမတ် ၁၅ ဦးနဲ့ ဒီမိုကရက် ၂ ဦးတို့က ကန့်ကွတ်မဲ ပေးခဲ့တာပါ။  ဂျိုးဘိုင်ဒင်က သမ္မတအာဏာအသုံးပြုပြီး ရုရှားရေနံပိတ်ပင်ဖို့ ကြေညာပြီး နောက်နေ့ လွှတ်တော်မှာ ဥပဒေကြမ်း အတည်ပြုဖို့ ဖြစ်လာတာပါ။ 

လွှတ်တော်မှာ ပါတီကြီးနှစ်ခုစလုံးရဲ့ ထောက်ခံမှု စံချိန်တင်ရရှိခဲ့ပြီး ရုရှားကို နိုင်ငံတကာကုန်သွယ်ရေးအဖွဲ့ WTO ထဲက ထုတ်ပစ်ဖို့အထိ ဥပဒေမှာ တောင်းဆိုထားပါတယ်။

နောက်ပြီး အောက်လွှတ်တော်က ယူကရိန်းကို အရေးပေါ်  ဒေါ်လာ ၁၃ ဒသမ ၆ ဘီလီယံ ကူညီဖို့လည်း မဲခွဲဆုံးဖြတ်နိုင်ခဲ့ပါတယ်။ 

အဆိုပါငွေထဲမှာ ယူကရိန်းကို စစ်လက်နက် ပံ့ပိုးဖို့နဲ့ လူသားချင်းဆိုင်ရာ အကူညီပေးမှုတွေ ပါဝင်ပါတယ်။