မွန်ပြည်နယ်၊ ကျိုက်ထိုမြို့နယ်၊ မရမ်းချောင်းကျေးရွာအနီးမှာ မတ်လ ၂၁ ရက် ည ၁၁ နာရီက ကရင်အမျိုးသားလွတ်မြောက်ရေးတပ်မတော် KNLA ပူးပေါင်းအဖွဲ့နဲ့ စစ်ကောင်စီတို့ကြားတိုက်ပွဲ ဖြစ်ပွားခဲ့တယ်လို့ KNU တပ်မဟာ(၁) သထုံခရိုင် ဥက္ကဋ္ဌ ပဒိုစောစိုးမြင့်က DVB ကို ပြောပါတယ်။

အဲဒီတိုက်ပွဲဟာ စစ်ကောင်စီဘက်က ညပိုင်း စစ်ကြောင်းလှုပ်ရှားလာတာကြောင့် ကရင်အမျိုးသား လွတ်မြောက်ရေးတပ်မတော် KNLA ပူးပေါင်းအဖွဲ့နဲ့ ထိတွေ့ တိုက်ပွဲ ဖြစ်ပွားခဲ့တာပါ။

နာရီဝက်ကြာ ဖြစ်ပွားခဲ့တဲ့ အဲဒီတိုက်ပွဲအတွင်းမှာတော့ စစ်ကောင်စီဘက်က ၄ ဦး သေဆုံးပြီး ၂ ဦး ထိခိုက်ဒဏ်ရာရှိခဲ့တယ်လို့ ပဒိုစောစိုးမြင့်က ပြောပါတယ်။

ဒါ့အပြင် မတ်လ ၂၁ ရက်နေ့ ည ၉ နာရီကလည်း KNLA နဲ့ PDF ပူးပေါင်းအဖွဲ့က သထုံမြို့နယ် ဝင်းပကျေးရွာက စစ်ကောင်စီ တပ်မ(၄၄) လက်အောက်ခံ ခြေမြန်တပ်ရင်း ခမရ (၉) ကို ၄၀ မမနဲ့ သွားရောက် ပစ်ခတ်တိုက်ခိုက်တာ ဖြစ်ပါတယ်။ အဲဒီတိုက်ခိုက်ကြောင့် စစ်ကောင်စီဘက်က တပ်ခွဲမှူး တစ်ဦး ထိခိုက် ဒဏ်ရာရရှိခဲ့တာပါ။

ကရင်အမျိုးသားအစည်းအရုံး KNU တပ်မဟာ(၁) ထိန်းချုပ်နယ်မြေဖြစ်တဲ့ ကျိုက်ထိုမြို့နယ်မှာတော့ KNLA ပူးပေါင်းတပ်နဲ့ စစ်ကောင်စီတပ်တို့ကြား မကြာခဏဆိုသလို ထိတွေ့တိုက်ပွဲတွေ ဖြစ်ပွားနေတာပါ။