ရုရှား အနုပညာရှင်တယောက်နဲ့ ယူကရိန်းနိုင်ငံသား အပန်းဖြေရိပ်သာပိုင်ရှင်တို့ဟာ ငြိမ်းချမ်းရေးကို အားပေးမြှင့်တင်ရင်း "ကျနော်တို့ဟာ အမြဲတမ်း ညီအစ်ကိုတွေလိုပဲ" လို့ ပြောလိုက်ကြပါတယ်။

ငြိမ်းချမ်းရေးနဲ့ စည်းလုံးညီညွတ်ရေးကို အားပေးမြှင့်တင်ဖို့ အင်ဒိုနီးရှားနိုင်ငံက အပန်းဖြေ စခန်းသာကျွန်း ဘာလီမှာ ညီညွတ်တဲ့ကမ္ဘာဆိုတဲ့ စကားလုံးကို ရုရှား အနုပညာရှင်တယောက်နဲ့ ယူကရိန်းနိုင်ငံသား အပန်းဖြေရိပ်သာပိုင်ရှင်တို့ဟာ ဘာသာစကား ၆ မျိုးနဲ့ ရေးသားခဲ့တာပါ။ အဆောက်အဦ ၉ ခုရဲ့ ၉၆၀ စတုရန်းမီတာကျယ်တဲ့  ခေါင်မိုးတွေမှာ ရေးထားတဲ့ ဒီစာလုံးပန်းချီတွေဟာ နိုင်ငံရေးကြေညာချက် မဟုတ်ဘူးလို့ ရုရှား လက်ရေးလှ အနုပညာရှင် ပါခရက်စ် လမ်းပတ်စ်က ပြောပါတယ်။

“ဒါဟာ လူတွေနဲ့ပတ်သက်တဲ့ ယဉ်ကျေးမှုဆိုင်ရာ ကြေညာချက်၊ လူမှုရေးဆိုင်ရာ ကြေညာချက်ပါ။ အနာဂတ်တခုကို ဟန်ချက်ညီညီ ဖန်တီးဖို့ ကျနော်တို့ ညီညွတ်နိုင်တယ်။”

စစ်ပွဲမစခင် ယူကရိန်းသူငယ်ချင်းအုပ်စုနဲ့အတူ စဉ်းစားထားတဲ့ အတွေးအခေါ် ဖြစ်ကြောင်းလည်း ဒီဇင်ဘာလတည်းက ဘာလီကျွန်းကို ရောက်နေတဲ့ လမ်းပတ်စ်က ပြောပါတယ်။ ခုတော့ ဒီလက်ရေးလှစာတန်းတွေဟာ ပိုပြီး အဓိပ္ပာယ်ရှိသွားပြီလို့ သူက ဆက်ပြောပါတယ်။

အပန်းဖြေရိပ်သာပိုင်ရှင် ယူကရိန်းနိုင်ငံသား အဲလက်စ် စတယ်ဖန်ကတော့ အနုပညာလက်ရာက သူ့တန်ဖိုးနဲ့ ကိုက်ညီပြီး အရေးကြီးတဲ့ သတင်းစကား တရပ်ကိုလည်း ပေးတယ်လို့ ပြောပါတယ်။

ယူကရိန်းမှာ စစ်ဖြစ်တဲ့အတွက် ထိတ်လန့်တုန်လှုပ်ရတယ်လို့ သူတို့ ၂ ယောက်စလုံးက ပြောပါတယ်။

“ရုရှားနဲ့ ယူကရိန်းဟာ အမြဲတမ်း ညီအစ်ကိုလိုပါပဲ။ ကျနော်တို့မှာ မတူခြားနားတဲ့ သီးခြား ယဉ်ကျေးမှု ရှိတယ်။ ရုရှားမှာလည်း လှပပြီး သီးခြားဆန်တဲ့ ယဉ်ကျေးမှုရှိတယ်။ ဒါပေမယ့် ကျနော်တို့က အမြဲနီးကပ်တယ်။ တယောက်နဲ့တယောက် အပြန်အလှန် အမြဲတမ်း ကူညီကြတယ်။ ကျနော်တို့က အချင်းချင်းလည်း ရုပ်ချင်းဆင်ကြတယ်။ စစ်ဖြစ်လာတာကို ကျနော်တို့ ယုံတောင် မယုံနိုင်ဘူး” လို့ အပန်းဖြေရိပ်သာပိုင်ရှင် အဲလက်စ် စတယ်ဖန်က ပြောပါတယ်။

ရုရှားဟာ ယူကရိန်းကို အထူးစစ်ဆင်ရေးလို့ ပြောပြီး ဖေဖော်ဝါရီ ၂၄ ရက်မှာ စတင် ကျူးကျော်ခဲ့တာပါ။

နာဇီလက်သစ်ဝါဒီ အမျိုးသားရေး အစွန်းရောက်တွေရဲ့ အန္တရာယ်ကို ချေမှုန်းဖို့လို့ ရုရှားအစိုးရက ပြောပေမယ့် ဒီစကားဟာ တမင်သက်သက် အကြောင်းရှာတာလို့ အမေရိကန်နဲ့ အနောက် မဟာမိတ်နိုင်ငံတွေက သတ်မှတ် ယူဆထားကြပါတယ်။