အာရှဒေသတွင်း နိုင်ငံတွေမှာ ကိုဗစ်-၁၉ ရောဂါကူးစက်ခံရသူ အရေအတွက်ဟာ သန်း ၁၀၀ ကျော်လာခဲ့ပြီ ဖြစ်ပါတယ်။

ရိုက်တာသတင်းဌာနရဲ့ လေ့လာဆန်းစစ်ချက်မှာတော့ ၂ ရက်တိုင်းမှာ ဒေသတွင်း ကိုဗစ်-၁၉ ကူးစက်မှုအသစ် ၁ သန်းကျော် ရှိနေခဲ့တာဖြစ်ပြီး ကမ္ဘာ့လူဦးရေရဲ့ ထက်ဝက်ကျော် နေထိုင်ရာ အာရှဒေသမှာ ရောဂါကူးစက်ခံရမှုအားလုံးရဲ့  ၂၁ ရာခိုင်နှုန်း ရှိနေတယ်လို့ ဆိုပါတယ်။

အိုမီခရွန်မျိုးကွဲက ကူးစက်နိုင်ခြေမြင့်မားပေမယ့် ပြီးခဲ့တဲ့ သီတင်းပတ်တွေထဲ တောင်ကိုရီးယား၊ တရုတ်နဲ့ ဗီယက်နမ်နိုင်ငံတွေမှာ အသေအပျောက်နည်းပါးတဲ့ အိုမီခရွန်မျိုးကွဲ BA.2 ကူးစက်မှုတွေ မြင့်တက်လာခဲ့တာမို့ ရောဂါကူးစက်မှု ကိန်းဂဏန်းတွေ ပိုပြီးတော့ တိုးလာစေခဲ့တာလို့ ဆိုပါတယ်။ လက်ရှိအချိန်မှာတော့ BA.2 ကူးစက်မှုဟာ နောက်ဆက်တွဲရောဂါဖြစ်ပွားမှုတွေ အားလုံးရဲ့ ၈၆ ရာခိုင်နှုန်းနီးပါးကို ကိုယ်စားပြုတယ်လို့ ကမ္ဘာ့ကျန်းမာရေးအဖွဲ့က ပြောပါတယ်။

ကမ္ဘာတဝန်း နေ့စဉ်ရောဂါကူးစက်ခံရသူ ၄ ယောက်မှာ ၁ ယောက်နှုန်းနဲ့ တောင်ကိုရီးယားနိုင်ငံက နေ့စဉ် ပျမ်းမျှရောဂါကူးစက်မှုနှုန်း အမြင့်ဆုံး ဖြစ်လာနေပြီး ပျမ်းမျှ နေ့စဉ် သေဆုံးနှုန်းကတော့ အယောက် ၃၀၀ ကျော်ထိ ရှိလာနေတယ်လို့ ဆိုပါတယ်။

တရုတ်နိုင်ငံကတော့ လတ်တလော ကူးစက်မှု အဆိုးဝါးဆုံး အခြေအနေကို ထိန်းချုပ်နိုင်ဖို့ ကြိုးစားနေပြီး ရှန်ဟိုင်းမြို့မှာ BA.2 အမျိုးအစား ကိုဗစ်-၁၉ ရောဂါဖြစ်ပွားမှု မြင့်တက်လာခြင်းက ဘဏ္ဍာရေး ဗဟိုချက်ကို ပိတ်ဆို့သွားစေဖို့ လှုံ့ဆော်ပေးနေတယ်လို့ ဆိုပါတယ်။ မြို့တော်တွင်းမှာလည်း ပြည်သူ ၂၆ သန်းကို လော့ခ်ဒေါင်း ၂ ဆင့်ချမှတ်ပြီး ရောဂါ ကူးစက်ပြန့်ပွားမှုကို ထိန်းချုပ်နိုင်ဖို့ အဝေးပြေးလမ်းမတွေ၊ တံတားတွေကိုပါ ပိတ်ထားခဲ့ရတာပါ။

တရုတ်နိုင်ငံမှာတော့ အခုနှစ်အစပိုင်းက စတင်ကာ ကိုဗစ်-၁၉ ရောဂါကူးစက်ခံရသူပေါင်း ၄ သောင်းခွဲကျော် ရှိခဲ့ပြီး ဒါဟာ ပြီးခဲ့တဲ့ ၂၀၂၁ တနှစ်တာလုံး ကူးစက်မှု ပမာဏထက် ပိုမိုများပြားတယ်လို့ ဆိုပါတယ်။

ကာကွယ်ဆေးထိုးနှံပြီးစီးမှုအနေနဲ့ တရုတ်လူဦးရေ ၉၀ ရာခိုင်နှုန်းကျော်ကို ထိုးနှံပြီးဖြစ်ပေမယ့် သက်ကြီးပိုင်းတွေကို လုံလောက်တဲ့ ထပ်ဆောင်း Booster ထိုးနှံနိုင်မှု မရှိသေးတာကြောင့် ပြန်လည်ကူးစက်မှု တွေ ရှိလာနိုင်တယ်လို့ ဆိုပါတယ်။

ရောဂါကူးစက်မှု မြင့်မားတဲ့ အိန္ဒိယနိုင်ငံတနိုင်ငံထဲမှာတင် ကိုဗစ်-၁၉ ရောဂါကူးစက်ခံရသူဦးရေ ၄၃ သန်းကျော် ရှိနေပြီး ဒါဟာ အာရှဒေသတွင်း အဆိုးဝါးဆုံးကူးစက်ခံနိုင်ငံတွေဖြစ်တဲ့ ဂျပန်၊ တောင်ကိုရီးယားနဲ့ ဗီယက်နမ်နိုင်ငံတွေမှာ ကူးစက်ခံရသူ စုစုပေါင်းထက် ကျော်လွန်နေတာပါ။

ပြီးခဲ့တဲ့ ၁၁ ရက်အတွင်းမှာတော့ အိန္ဒိယနိုင်ငံမှာ နေ့စဉ်ရောဂါကူးစက်မှုနှုန်းဟာ ၂၀၀၀ အောက် ကျဆင်းလာခဲ့ပြီး နေ့စဉ်ကူးစက်မှုအမြင့်ဆုံး စံချိန်ကတော့ ပြီးခဲ့တဲ့ ဇန်နဝါရီလမှာ နေ့စဉ်ပျမ်းမျှ ကူးစက်မှုနှုန်း ၃ သိန်းကျော်ထိ ရောက်ရှိခဲ့တာ ဖြစ်ပါတယ်။

အခုမတ်လအစောပိုင်းမှာတော့ အာရှဒေသတွင်း ကိုဗစ်-၁၉ ကြောင့် သေဆုံးသူဦးရေ ၁ သန်းကျော်သွားခဲ့ပြီးဖြစ်ကာ လတ်တလောအချိန်ထိ ၁,၀၂၇,၅၈၆ ယောက်ထိ ရှိလာနေပါတယ်။

ကာကွယ်ဆေးတွေဟာ BA.2 မျိုးကွဲနဲ့ နှိုင်းယှဉ်ရင် ထိရောက်မှုနည်းတယ်လို့ ယူဆနိုင်ပြီး လေ့လာမှုတွေအရ အိုမီခရွန်ရောဂါပိုးဟာ မတူညီတဲ့ ကိုရိုနာဗိုင်းရပ်မျိုးကွဲတွေနဲ့ အရင်က ရောဂါကူးစက်ခံခဲ့ရဖူးတဲ့သူတွေကိုပါ ပြန်လည်ကူးစက်နိုင်ကြောင်းလည်း တွေ့ရှိရတယ်လို့ ဆိုပါတယ်။