နေပြည်တော်မှာ မတ်လ ၂၇ ရက်ကကျင်းပခဲ့တဲ့ ၇၇ နှစ်မြောက်  ဖက်စစ်တော်လှန်ရေးနေ့  စစ်ရေးပြပွဲမှာ စစ်သားတွေနဲ့ ရဲတွေ ခိုက်ရန်ဖြစ်ပွားခဲ့တာနဲ့  ပတ်သက်ပြီး ရဲတပ်ဖွဲ့ဝင် ၅ ယောက်ကို  အချုပ်ထဲထည့်ဖမ်းဆီးထားတယ်လို့ ရဲအသိုက်အဝန်းကနေ သိရပါတယ်။ 

စစ်ရေးပြပွဲမှာ စစ်သားတွေပါတဲ့ စစ်ကြောင်းနဲ့ ရဲမေတွေပါတဲ့ စစ်ကြောင်း စကားများရာကနေ စတင်ရန်ဖြစ်ပြီး စစ်သား ၃ ယောက်  ဒဏ်ရာရရှိခဲ့တာကြောင့် အခုလို ရဲ ၅ ယောက်ကို  ဖမ်းဆီးထားတာဖြစ်တယ်လို့ လုံခြုံရေးအရ အမည်မဖော်လိုတဲ့ ရဲတပ်ဖွဲ့ဝင်တဦးက ပြောပါတယ်။ 

“ဒီကောင်တွေက ရဲမေတွေကိုစတာ အဲ့ကနေ ပြဿနာတက်တာ။ ပြဿနာတက်တော့ ဝိုင်းထိုးတဲ့ပုံရတယ်။ အဲ့မှာ စစ်သား ၃ ယောက်က ထိခိုက်ဒဏ်ရာရတာမျိုးပေါ့။ အဲ့တာကြောင့် အဖမ်းခံရတာ ခုတော့ ဗဟိုကင်းအချုပ်မှာ” လို့ ပြောပါတယ်။

စစ်သားတွေနဲ့ ရဲတွေ ရန်ဖြစ်တဲ့ ရုပ်သံဖိုင်ဟာ လူမှုကွန်ရက်စာမျက်နှာတွေမှာ ပျံ့နှံလာတာကြောင့် ခုလိုမျိုး ထိန်းသိမ်းခံရတာဖြစ်နိုင်တယ်လို့ ဆိုပါတယ်။ 

စစ်ကောင်စီတပ်သားတွေကို ဝိုင်းထိုးခဲ့တဲ့ ရဲတပ်ဖွဲ့ဝင် ၅ ဦးကို ရန်ဖြစ်တဲ့နေ့မှာ စစ်တပ်ဗဟိုကင်းကို အရင် ခေါ်ဆောင်သွားတာဖြစ်ပြီး ၂ ရက်အကြာမှ ရဲဌာနချုပ်လက်အောက်မှာရှိတဲ့ ဗဟိုကင်းကို ပြန်ပို့ခဲ့တာဖြစ်တယ် လို့ သိရပါတယ်။

Photo-DSINFO