အမေရိကန်သမ္မတ ဂျိုးဘိုင်ဒင် အစိုးရအဖွဲ့က ယူကရိန်းအရှေ့ဘက်ခြမ်းမှာ ရှရှားရဲ့ ကြီးမားတဲ့ ထိုးစစ်အား ကာကွယ်ဖို့ ယူကရိန်းကို စစ်ရေးအကူအညီ ဒေါ်လာ သန်း ၈၀၀ ပေးမယ်လို့ ဧပြီ ၁၃ ရက်မှာ ကြေညာလိုက်ပါတယ်။

ဖေဖော်ဝါရီ ၂၄ ရက် ရုရှားကျူးကျော်စစ်စတင်ကတည်းက ယူကရိန်းကို အမေရိကန် စစ်ရေးအကူအညီဟာ ဒေါ်လာ ၂ ဒသမ ၅ ဘီလီယံရှိပြီး သံချပ်ကာကား၊ အမြောက်နဲ့ တကိုယ်ရည်သုံး လက်နက်တွေ အဓိက ပါဝင်ပါတယ်။

နောက်ထပ် လက်နက်သစ်တွေ ပေးဖို့အတွက် ယူကရိန်းတပ်တွေကို လေ့ကျင့်ပေးဖို့ လိုမယ်လို့ ပင်တဂွန် ပြောရေးဆိုခွင့်ရှိသူ ဂျွန်ကာဘီက ပြောပါတယ်။

သူက “ယူကရိန်းတပ်တွေကို နောက်ထပ် လေ့ကျင့်ပေးရမယ့် စနစ်တွေက ဟောင်ဝစ်ဇာအမြောက်တွေ၊ တန်ပြန်အမြောက်ရေဒါတွေပါ။ သိပ်ရှုပ်ထွေးတဲ့စနစ် မဟုတ်ပါဘူး။ သူတို့ မသုံးဘူးသေးလို့ လေ့ကျင့်ပေးလိုက်ရမှာပါ” လို့ ပြောပါတယ်။

အဆိုပါ လုံခြုံရေးအကူအညီ အစီအစဉ်သစ်ကို အမေရိကန်သမ္မတက လွှတ်တော်ရဲ့ သဘောတူညီချက် မရယူဘဲ အရေးပေါ် လွှဲပြောင်းပေးနိုင်တဲ့ ဥပဒေ‌ PDA ခေါ် Presidential Drawdown Authority‌ အောက်ကနေ ပေးသွားမှာပါ။

အမေရိကန်စစ်တပ် မြို့ပြစစ်ရေးကျွမ်းကျင်သူ အငြိမ်းစားဗိုလ်မှူးက အခုပေးတဲ့ လက်နက်တွေဟာ အားရစရာကောင်းတယ်လို့ ပြောပါတယ်။

“မူဝါဒအပြောင်းအလဲလို့ ထင်ပါတယ်၊ ယူကရိန်းက ရုရှားကို ဗြောင်ဖွင့်တိုက်ဖို့ လက်နက်အင်အား လိုနေတာပါ။ အရှေ့ဘက်ခြမ်းမှာ ကာကွယ်ရုံသက်သက်ဆို ဆုံးရှုံးမှု များမယ်၊ အခု အမေရိကန်အစိုးရက လိုအပ်နေတဲ့ လက်နက်တွေ ပေးလိုက်တာ မူဝါဒ ပြောင်းသွားတာပဲ၊ အားတက်ဖို့ ကောင်းပါတယ်။”