ရုရှားတပ်တွေ ယူကရိန်းအရှေ့ပိုင်းဒေသကို စတင်တိုက်ခိုက်နေပြီလို့ ယူကရိန်း သမ္မတ ဇီလန်စကီးနဲ့ ထိပ်တန်းအရာရှိတွေက ပြောပါတယ်။ 

အရင်လ နှောင်းပိုင်းက ရုရှားတပ်တွေ ပြန်လည်ဆုတ်ခွာခဲ့ပြီးနောက် အခုတခါ ယူကရိန်း အရှေ့ဘက် စစ်မျက်နှာကို ပြန်လည် ထိုးစစ်ဆင်နေတာပါ။ 

“ဒွန်းဘက်စ်ဒေသမှာ တိုက်ပွဲ စဖြစ်နေပါပြီ။ ဒါဟာ ရုရှားဘက်က အရင်ကတည်းက ပြင်ဆင်ထားတဲ့ ထိုးစစ်ပါပဲ” လို့ ဇီလန်စကီးက ဗီဒီယို မိန့်ခွန်းမှာ ပြောသွားတာပါ။

ယူကရိန်းအရှေ့မြောက်ဒေသကနေ ပြန်ဆုတ်သွားတဲ့ ရုရှားတပ်တွေနဲ့ ရုရှားရဲ့မဟာမိတ် ဘီလာရု နိုင်ငံလမ်းကြောင်းကနေ ဝင်လာတဲ့ တပ်တွေပေါင်းပြီး ဒွန်းဘက်စ်ဒေသကို ထိုးစစ်ဆင်နေတာပါ။

ဒွန်းဘက်စ်ဒေသကြီးထဲမှာ ဒွန်းတပ်စ်နဲ့ လူ့ဟန့်ခ် ဒေသတွေကို ပါဝင်ပါတယ်။

ရုရှားရဲ့တကျော့ပြန် စစ်ဆင်ရေးဟာ နှစ်ဖက်စလုံး အထိအခိုက်များနိုင်တယ်လို့ စစ်ရေး အကဲခတ်တွေက သုံးသပ်ထားကြပါတယ်။