ယူကရိန်းနိုင်ငံ မြို့တော် ကိယက်ဗ်မှာ ဧပြီ ၂၈ ရက်က ရုရှားဘက်က မစ်ဇိုင်းဒုံးကျည်နှစ်လုံး ကျရောက်ပေါက်ကွဲခဲ့ရာမှာ တလုံးက လူနေအဆောက်အအုံ အောက်ထပ်ကို ထိမှန်ခဲ့ပြီး အနည်းဆုံး လူ ၃ ဦး ဒဏ်ရာရသွားတယ်လို့ ယူကရိန်း အာဏာပိုင်တွေက ပြောပါတယ်။

ဒုံးကျည်တလုံးဟာ ရှက်ဗ်ချန်းကိုမြို့နယ်ထဲ ကျရောက်ခဲ့ပြီး ဒဏ်ရာရတဲ့ လူ ၃ ယောက်ကို ဆေးရုံတင်လိုက်ရတယ်လို့ ကိယက်ဗ်မြို့တော်ဝန် ဗစ်တာလီ ခရစ္စကိုက ပြောပါတယ်။

နောက်တလုံးက လူနေရပ်ကွက်အနား ကျရောက်ပေါက်ကွဲခဲ့တယ်လို့ အရေးပေါ် ကယ်ဆယ်ရေးအဖွဲ့က ပြောပါတယ်။

ရုရှားဘက်က ဒုံးကျည်နဲ့ တိုက်ခိုက်တာကို ယူကရိန်း ကာကွယ်ရေးဝန်ကြီးနဲ့ နိုင်ငံခြားရေး ဝန်ကြီးတို့ကလည်း အတည်ပြုပါတယ်။

မြို့ထဲမှာ ပေါက်ကွဲမှုနှစ်ကြိမ် ဖြစ်ခဲ့ပြီး ပေါက်ကွဲသံတွေ ကြားရတဲ့အကြောင်း မျက်မြင်သက်သေတွေကို ကိုးကားပြီး ရိုက်တာသတင်းမှာ ဖော်ပြထားပါတယ်။

ရုရှားတပ်တွေဟာ ကိယက်ဗ်မြို့ကို သိမ်းဖို့ ကြိုးစားပေမဲ့ မအောင်မြင်ခဲ့ဘဲ ပြန်ဆုတ်သွားတဲ့နောက်ပိုင်း ယူကရိန်းမြို့တော်ဟာ စစ်ဘေးဒဏ် မခံရသလောက် ရှိနေခဲ့တာပါ။

အခုလို ရုရှားရဲ့ တိုက်ခိုက်မှုဟာ ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရက်စ်ရဲ့ ယူကရိန်းခရီးစဉ်နဲ့ တိုက်ဆိုင်နေပါတယ်။