အင်္ဂလန်လိဂ် ၂ ပြိုင်ပွဲနောက်ဆုံးပွဲစဉ်မှာ လုပ်ပွဲဆန်ဆန် ရလဒ်ကြောင့် တန်းတက်ကစားခွင့် မရခဲ့တဲ့အပေါ်မှာ နော်သမ်တန်အသင်းက ကန့်ကွက်လွှာတင်ထားပါတယ်။ 

လိဂ် ၂ နောက်ဆုံးပွဲစဉ်မှာ ဘရစ္စတိုးရိုဗာအသင်းက အမှတ်ပေးဇယားအောက်ဆုံးက စကန်သော်ပီ အသင်းနဲ့ ကစားခဲ့ရာမှာ  ၇ ဂိုး ဂိုးမရှိနဲ့ အနိုင်ရခဲ့ပါတယ်။ 

ဒီရလဒ်ကြောင့် နော်သမ်တန်အသင်းနဲ့ ဂိုးကွာခြားချက် တူညီခဲ့ပေမယ့် ရဂိုး၊ ပေးဂိုးများခဲ့မှုကြောင့် ဘရစ္စတိုးလ်က လိဂ် ၁ ကို တန်းတက်ကစားခွင့်ရခဲ့ပါတယ်။ 

နော်သမ်တန် အသင်းဟာလည်း နောက်ဆုံးပွဲစဉ်မှာ ဘာရိုးအသင်းကို ၃ ဂိုး ၁ ဂိုးနဲ့အနိုင်ရခဲ့ပေမယ့် တိုက်ရိုက်တန်းတက်ခွင့်နဲ့ လွဲချော်ခဲ့ပြီး  ပလေးအော့ဖ် ကစားခွင့်သာ ရရှိခဲ့ တာပါ။ 

ဘရစ္စတိုးလ်ရိုဗာနဲ့ ကစားခဲ့တဲ့ စကန်သော်ပီအသင်းဟာ အမှတ်ပေးဇယားအောက်ဆုံးမှာ ရောက်ရှိနေတဲ့အသင်းဖြစ်ပြီး တန်းဆင်းခဲ့ရပြီးဖြစ်တာကြောင့် ဆယ်ကျော်သက်ကစားသမား ၇ ဦး အထိ ထည့်သွင်းအသုံးပြုခဲ့ပါတယ်။

ဒီလိုအခြေအနေကြောင့်လည်း ဘရစ္စတိုးလ်အသင်းက တိုက်ရိုက်တန်းတက်ကစားခွင့်အတွက် လိုအပ်တဲ့ သွင်းဂိုးအရေအတွက်ကို သွင်းယူနိုင်ခဲ့တာပါ။ 

ဆယ်ကျော်သက်ကစားသမားတွေကို အသုံးပြုခဲ့သလို ၁၇ နှစ်အရွယ်ဂိုးသမားကို ပွဲထွက်ကစားစေခဲ့တဲ့ စကန်သော်မီအသင်းရဲ့ လုပ်ရပ်ဟာ ပြိုင်ပွဲကို လေးစားမှုမရှိ တဲ့လုပ်ရပ်ဖြစ်တယ်လို့  နော်သမ်တန်အသင်းက စွပ်စွဲခဲ့ပြီး အရေးယူဖို့အတွက် EFL ကို တိုင်ကြားထားပါတယ်။