အသင်းဟောင်း လီဗာပူးတိုက်စစ်မှူးဆာလာနဲ့ ရန်တိုက်ပေးနေသူတွေရှိပေမယ့် ပြဿနာ တစ်စုံတစ်ရာမရှိကြောင်း ဘိုင်ယန်တိုက်စစ်မှူးမာနေးက ပြောပါတယ်။

မာနေးဟာ ၂၀၂၂ ခုနှစ်အတွက် အာဖရိကအကောင်းဆုံးကစားသမားဆုကို ဆာလာကို ကျော်ဖြတ်ပြီးရယူနိုင်ခဲ့ပါတယ်။

အဲဒီဆုကို လက်ခံရယူအပြီးမှာ ဆာလာနဲ့ ရန်တိုက်ပေးနေသူတွေရှိကြောင်း မာနေးက ပြောကြားခဲ့ပြီး ဆာလာနဲ့ ဆက်ဆံရေးအခြေအနေ ကောင်းမွန်ကြောင်း မာနေးက ပြန်လည်ဖြေရှင်းခဲ့တာပါ။

မာနေးက “တခါတလေမှာ လူတွေက ကျနော်နဲ့ မိုဆာလာကို ပြိုင်ဆိုင်မှုရှိတဲ့ ရန်ဘက်တွေဖြစ်လာအောင် ပြောကြတယ်။ ဒါပေမဲ့ အရှင်းဆုံးပြောရရင် ကျနော့်အနေနဲ့ ဘယ်ကစားသမားကိုမှ ပြိုင်ဘက်အနေနဲ့ သဘောမထားပါဘူး။ ကျနော်တို့ကြားမှာလည်း ဆက်ဆံရေးကောင်းရှိပြီး စာတိုတွေ အမြဲပို့နေကျပါ။ မီဒီယာတွေကပဲ ရန်လိုအောင် အမြဲတမ်းကြိုးစားနေကြတာဖြစ်တယ်” လို့ ပြောပါတယ်။ 

လီဗာပူးမှာ တွဲဖက်ကစားစဉ်က ဆာလာဟာ ဂိုးပိုရဖို့အတွက်သာ အာရုံစိုက်ပြီး မာနေးကို ဘောလုံးပေးပို့မှုမရှိခဲ့ကြောင်း မီဒီယာတွေက ရေးသားခဲ့ကြတာဖြစ်ပါတယ်။