မကြာသေးမီရက်တွေအတွင်း ယူကရိန်းရဲ့ သိသာထင်ရှားတဲ့ ပိုင်နက်နယ်မြေ တိုးတက်မှုတွေဟာ အိမ်နီးချင်း ရုရှားရဲ့ ကျူးကျော်စစ်ပွဲထဲမှာ အချိုးအကွေ့တရပ်လို့ ပြောဖို့ အချိန်စောလွန်းသေးတယ်လို့ ဂျာမန်ကာကွယ်ရေးဝန်ကြီး ခရစ်စတင်း လမ်ဘရပ်ချ်က စက်တင်ဘာ ၁၄ ရက်မှာ ပြောလိုက်ပါတယ်။

“ရုရှားတွေက အခု (ယူကရိန်းရဲ့ တန်ပြန်ထိုးစစ်ကို) ဘယ်လိုတုံ့ပြန်မလဲဆိုတာ မသိသေးတဲ့အတွက် ဒါက အကဲဖြတ်ဖို့ခက်ပါတယ်” လို့ လန်ဘရပ်ချ်က ဘာလင်မြို့တော်ရှိ ကာကွယ်ရေးဝန်ကြီးဌာနမှာလုပ်တဲ့ လူတွေ့မေးမြန်းခန်းမှာ ရိုက်တာသတင်းဌာနကို ပြောခဲ့ပါတယ်။

ယူကရိန်းတပ်ဖွဲ့တွေဟာ အရှေ့မြောက်ပိုင်း ခါကိဗ်ဒေသမှာရှိတဲ့ အထူးတပ်ဖွဲ့တွေနဲ့ ထိုးစစ်ဆင်ရာမှာ ရုရှားတပ်တွေ ဆုတ်ခွာထွက်ပြေးခဲ့ရပါတယ်။

ယူကရိန်းသမ္မတ ဗိုလိုဒီမာ ဇလန်းစကီးက သူ့စစ်တပ်ဟာ အခုလအထိ နယ်မြေ ၃,၁၀၀ စတုရန်းမိုင် ဝန်းကျင်ကို ပြန်သိမ်းပိုက်နိုင်ခဲ့တယ်လို့ ပြောပါတယ်။

ယူကရိန်းက အခိုင်အမာ ပြောထားတဲ့ စစ်မြေပြင်နယ်ပယ် အပြည့်အစုံကို ချက်ချင်း အတည်မပြုနိုင်သေးပါဘူး။

လမ်ဘရပ်ချ်က “ယူကရိန်းတပ်ဖွဲ့တွေက နည်းဗျူဟာကျကျ နေရာယူထားပြီး တိုက်ခိုက်မှုတွေကို ချေမှုန်းနိုင်စွမ်းရှိတယ်ဆိုတာကို သက်သေပြနေပါတယ်” လို့  ပြောပါတယ်။

ယူကရိန်းအစိုးရက လက်နက်ကြီးတွေ ပိုထောက်ပံ့ဖို့နဲ့ ခေတ်မီ အနောက်တိုင်းတင့်ကားတွေ ပေးအပ်ဖို့ ဂျာမန်အစိုးရကို လတော်တော်ကြာကြာ တွန်းအားပေးနေခဲ့ပြီး ဂျာမန်အဓိပတိ အောလော့ဖ် ရွှိုက်ဇ်က တောင်းဆိုချက်ကို အကြိမ်ကြိမ် ပယ်ချခဲ့ပါတယ်။