အာဂျင်တီးနားနိုင်ငံရဲ့ လစဉ်ငွေကြေးဖောင်းပွမှုနှုန်းဟာ ဩဂုတ်လမှာ ၇ ရာခိုင်နှုန်း ရှိခဲ့တယ်လို့  အစိုးရရဲ့ INDEC စာရင်းအင်း အေဂျင်စီက ပြောလိုက်ပါတယ်။

လေ့လာသုံးသပ်သူတွေက စားသုံးသူစျေးနှုန်းတွေ  ၆ ဒသမ ၆ ရာခိုင်နှုန်းတိုးလာမယ်လို့ ခန့်မှန်းထား ခဲ့ပေမဲ့  ဒီထက်ပိုမို ကျော်လွန်ပြီး ပိုများခဲ့တာပါ။

တောင်အမေရိကတိုက်က အာဂျင်တီးနားနိုင်ငံမှာ စားသုံးသူစျေးနှုန်းတွေ တဟုန်ထိုးတက်နေလို့ ပြည်သူတွေရဲ့ လုပ်ခနဲ့ စုဆောင်းငွေတွေ ကျဆင်းနေပါတယ်။ ကုန်စျေးနှုန်းတွေကလည်း အခုနှစ်ပထမရှစ်လမှာ ၅၆ ဒသမ ၄ ရာခိုင်နှုန်းတက်ခဲ့ပါတယ်။

အဓိကအနေနဲ့ ပဲပိစပ်၊ ပြောင်းနဲ့ဂျုံ တင်ပို့တဲ့ အာဂျင်တီးနားဟာ နိုင်ငံတကာ ငွေကြေးရန်ပုံငွေအဖွဲ့နဲ့ ဒေါ်လာ ၄၄ ဘီလီယံ သဘောတူညီချက်ရဲ့ တစ်စိတ်တစ်ပိုင်းအဖြစ် ငွေကြေးဖောင်းပွမှုကို လျှော့ချဖို့ ရည်မှန်းထားပါတယ်။၊

စီးပွားရေးဝန်ကြီး ဆာဂျီယိုမက်စ်ဆာက စီးပွားရေးတည်ငြိမ်ဖို့ ခိုင်မာတဲ့ခြေလှမ်းတွေကို လှမ်းရင်း အခုသီတင်းပတ်အတွင်း  IMF ကချီးကျူးခံရတဲ့ စီးပွားရေး အစီအစဉ်အသစ်ကို ဦးဆောင်ပါတယ်။ ကြွေးမြီနဲ့ ငွေကြေးအကျပ်အတည်းတွေကို နှစ်ပေါင်းများစွာ ရုန်းကန်နေရတဲ့ အာဂျင်တီးနားဟာ မကြာသေးမီက ဗဟိုဘဏ်စစ်တမ်းတစ်ခုအရ ၂၀၂၂ ခုနှစ်မှာ ၉၅ ရာခိုင်နှုန်းနဲ့  အဆုံးသတ်မယ့် ကမ္ဘာ့ငွေကြေးဖောင်းပွမှုနှုန်းကို လျှော့ချဖို့ ရုန်းကန်နေရပါတယ်။

စားနပ်ရိက္ခာနဲ့ လောင်စာဆီ ဈေးနှုန်းတွေ အထူးသဖြင့် မြင့်တက်လာတာဟာ အာဂျင်တီးနားနိုင်ငံကို ဆိုးဆိုးရွားရွား ထိခိုက်စေခဲ့ပါတယ်။