close

အစ္စရေးသမ္မတနှင့် အမေရိကန်သမ္မတတို့ အီရန်အရေး ဆွေးနွေး

အစ္စရေးသမ္မတ အိုင်ဇက်ဟာဇော့ဂ်ဟာ အမေရိကန်သမ္မတ ဂျိုးဘိုင်ဒင်နဲ့တွေ့ဆုံစဉ် ရုရှားကို လက်နက်တွေထောက်ပံ့ပေးနေတဲ့ အီရန်အရေးကိစ္စ ဆွေးနွေးခဲ့တယ်လို့ အောက်တိုဘာ ၂၆ ရက်က အိမ်ဖြူတော်အစည်းအဝေးမှာ ပြောကြားခဲ့ပါတယ်။

ခေါင်းဆောင်နှစ်ဦးဟာ ကိစ္စအတော်များများကို ပွင့်ပွင့်လင်းလင်း ဆွေးနွေးခဲ့ကြပြီး အီရန်အရေးကို အဓိကထား ဆွေးနွေးခဲ့ကြောင်း ဟာဇော့ဂ်က ပြောပါတယ်။

အီရန်ရဲ့ နျူကလီးယားလက်နက်ကို တစိုက်မတ်မတ် အားထုတ်မှု၊ အီရန်က သူ့နိုင်ငံသားတွေကို ရက်စက်ကြမ်းကြုတ်တဲ့နည်းနဲ့ နှိပ်စက်မှု၊ အပြစ်မဲ့ ယူကရိန်းနိုင်ငံသားတွေကို သတ်ဖြတ်တဲ့ လက်နက်တွေ ထောက်ပံ့ရာမှာ အီရန်ရဲ့ လုပ်ဆောင်မှုတွေအကြောင်း ဆွေးနွေးခဲ့တယ်လို့ သတင်းထောက်တွေကို ပြောပါတယ်။

မနက်ဖြန်မှာ လက်မှတ်ရေးထိုးမယ့် လက်ဘနွန် ပင်လယ်ရေကြောင်းနယ်နိမိတ် သဘောတူညီချက်ကို အကောင်အထည်ဖော်ရာမှာ အမေရိကန် ခေါင်းဆောင်ပိုင်းကို ကျေးဇူးတင်ရှိကြောင်းလည်း ပြောပါတယ်။ ဒါ့အပြင် ရာသီဥတုဆိုင်ရာ ကိစ္စရပ်တွေကို ဆွေးနွေးခဲ့တယ်လို့လည်း ဆိုပါတယ်။

သူနဲ့ ဘိုင်ဒင်တို့ဟာ လာမယ့်လ အီဂျစ်မှာ ကျင်းပမယ့် COP27 ကုလသမဂ္ဂ ရာသီဥတုပြောင်းလဲမှုဆိုင်ရာ ထိပ်သီးအစည်းအဝေးကို တက်ရောက်မှာ ဖြစ်ကြောင်း ဟာဇော့ဂ်က ပြောကြားခဲ့ပါတယ်။

ဟာဇော့ဂ်ဟာ အင်္ဂါနေ့မှာ ဝါရှင်တန်ကို ၂ ရက်ကြာ အလည်အပတ်ခရီး စတင်ခဲ့တာဖြစ်ပြီး သူဟာ အမေရိကန် အောက်လွှတ်တော်ဥက္ကဋ္ဌ နန်စီပေလိုစီ၊ နိုင်ငံခြားရေးဝန်ကြီး အန်တိုနီဘလင်ကန်နဲ့ အမျိုးသားလုံခြုံရေးအကြံပေး ဂျိတ်ဆူလီဗန် တို့ကိုလည်း တွေ့ဆုံခဲ့ပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
Up