ကုလသမဂ္ဂ COP27 ထိပ်သီးအစည်းအဝေးကျင်းပရာ အီဂျစ်နိုင်ငံရဲ့ ပင်လယ်နီ အပန်းဖြေမြို့က သတ်မှတ်ဧရိယာမှာ အရပ်ဘက်လူမှုအဖွဲ့အစည်းတွေနဲ့ လူငယ်တက်ကြွလှုပ်ရှားသူတွေဟာ နိုဝင်ဘာ ၉ ရက်က စုဝေးဆန္ဒပြခဲ့ကြပါတယ်။

နိုဝင်ဘာ ၉ ရက် အစောပိုင်းက ပင်မထိပ်သီးအစည်းအဝေး ကျင်းပရာနေရာ အပြင်ဘက်ရှိ စီးပွားရေးဆိုင်ရာ ပြပွဲတွေနဲ့ အရပ်ဘက်အဖွဲ့အစည်းတွေအတွက် သတ်မှတ်ပေးထားတဲ့ ‘စိမ်းလန်းဇုန်’ ဧရိယာမှာ ကျောင်းသား ၃၂ ယောက်ဟာ ညီလာခံကျင်းပနေတဲ့ ရှမ်အယ်လ်ရှိတ်မြို့မှာ ရာသီဥတုဖောက်ပြန်မှုကြောင့် သန္တာကျောက်တန်းတွေ ပျက်စီးသွားပုံအကြောင်း ဆိုင်းဘုတ်တွေကိုင်ဆောင်ပြီး ဆန္ဒပြခဲ့ကြတာပါ။

ဒီစုဝေးမှုတွေမှာ အချိန် ၁ နာရီထက် ပိုစုဝေးကြသူတွေ ဘယ်သူမှမရှိကြဘဲ တချို့ကလည်း တနာရီမပြည့်သေးခင်မှာပဲ လူစုခွဲသွားကြပါတယ်။

သူတို့အားလုံးကို သီတင်း ၂ ပတ်ကြာကျင်းပတဲ့ နိုင်ငံတကာ ထိပ်သီးအစည်းအဝေး ကာလအတွင်း ကုလသမဂ္ဂ တာဝန်ယူထားတဲ့ နေရာတွေမှာ ထိန်းသိမ်းထားပါတယ်။

COP27 ညီလာခံမတိုင်ခင် တက်ကြွလှုပ်ရှားသူတွေဟာ အီဂျစ်နိုင်ငံရှိ လုံခြုံရေးအဆင့်မြှင့်ထားတဲ့ ခရီးသွားအပန်းဖြေစခန်းမှာ သူတို့ရဲ့အသံတွေကို ကန့်သတ်ထားမှာ စိုးရိမ်ခဲ့ကြပါတယ်။

အီဂျစ်အစိုးရကတော့ ကန့်သတ်ဇုန်အတွင်း ဆန္ဒပြမှုတွေကို ခွင့်ပြုမယ်လို့ ပြောထားပါတယ်။

အရပ်ဘက်အဖွဲ့အစည်းတွေဟာ ဒီထိပ်သီးစည်းဝေးပွဲ မတိုင်ခင် တနှစ်တာလုံး ပြင်ဆင်ကြိုးပမ်းထားရတာဖြစ်ပြီး အဲဒီထဲမှာ ရေကြီးတာ သို့မဟုတ် တောမီးလောင်တာလို ရာသီဥတုကြောင့် ဖြစ်လာရတဲ့ ကပ်ဘေးတွေကို ကြုံတွေ့ထိခိုက်ခဲ့ရတဲ့ ဆင်းရဲနွမ်းပါးတဲ့ နိုင်ငံတွေကို လျော်ကြေးပေးဖို့ တောင်းဆိုတာတွေ ပါဝင်တယ်လို့ ရာသီဥတုမူဝါဒမှာ ကျား မ တန်းတူညီမျှရေး လှုံ့ဆော်သူ တောင်အာဖရိကမှ အသက် ၂၉ နှစ်အရွယ် ဇူကီဆွာ ဝှိုက်က ပြောပါတယ်။

ကုလသမဂ္ဂ ရာသီဥတုဆိုင်ရာ ဆွေးနွေးပွဲတွေမှာ ဖွံ့ဖြိုးဆဲနိုင်ငံတွေရဲ့ ဆုံးရှုံးမှုနဲ့ နစ်နာကြေးပေးချေမှု ပြဿနာကို ညီလာခံအစီအစဉ်ထဲမှာ ပထမဦးဆုံးအကြိမ် တင်ပြလို့ရလာခဲ့တာ ဖြစ်ပါတယ်။