မန္တလေးတိုင်း၊ ပြည်ကြီးတံခွန်မြို့နယ်၊ ၆၂ လမ်း၊ ၁၁၄ လမ်းနဲ့ ၁၁၅ လမ်းကြားရှိ ပြည်ကြီးတံခွန် အဆင့်မြင့်ရဲစခန်း ဂိတ်ပေါက်ကို ဗုံးနဲ့ပစ်ခတ်တိုက်ခိုက်ခဲ့တယ်လို့ NGU : FF မြေခွေးတပ်ဖွဲ့က ထုတ်ပြန်ပါတယ်။

ဒီဇင်ဘာ ၁၅ ရက် ညနေ ၄ နာရီလောက်က ရဲအင်အား ၄၀ လောက်ရှိတဲ့ အဆင့်မြင့် ရဲစခန်းကို ပေ ၂၀ ဝန်းကျင်အတွင်းရှိလူတွေ သေစေနိုင်တဲ့ ဗုံး ၁ လုံးနဲ့ တိုက်ခိုက်ခဲ့ရာ စစ်ကောင်စီလက်အောက်ခံ ရဲတပ်သား ၂ ဦး သေဆုံးတယ်လို့ ထုတ်ပြန်ချက်မှာ ဖော်ပြပါတယ်။

မြေခွေးတပ်ဖွဲ့ ပြန်ကြားရေးတာဝန်ရှိသူက “အဆင့်မြင့်ရဲစခန်းမှာ အင်အားများတယ်။ ရဲနှစ်ယောက်ကြားထဲ ဗုံးပစ်ထည့်ခဲ့တာ။ ဒီဗုံးက တော်တော်ပြင်းပါတယ်။ ပေ ၂၀ ဝန်းကျင်မှာရှိတဲ့ လူတွေအကုန်သေနိုင်တယ်” လို့ ဒီဗွီဘီကို ပြောပါတယ်။

အဆိုပါတိုက်ခိုက်မှုကို Anonymous Force MDY၊ VOMDY-Front Warrior နဲ့ Truth Keeping Force တို့က ပူးပေါင်းဆောင်ရွက်ခဲ့တာပါ။

ဒီဇင်ဘာ ၁၃ ရက်ကလည်း အောင်မြေသာစံမြို့နယ်အတွင်းရှိ စစ်ကောင်စီကို အခွန်ဆောင်ပြီး ဖွင့်လှစ်ထားကာ ကလပ်အတွင်း မူးယစ်ဆေးဝါးတွေ သုံးစွဲခွင့်ပေးထားတဲ့ Zeus Bar ကို NGU : FF မြေခွေးအဖွဲ့နဲ့ ပူးပေါင်းအဖွဲ့တွေက ဗုံးပစ်သတိပေးခဲ့ပါသေးတယ်။