ပြင်သစ်နိုင်ငံ ပါရီမြို့လယ်ရှိ ကာ့ဒ်ယဉ်ကျေးမှုစင်တာနဲ့ ကာ့ဒ် ကော်ဖီဆိုင်မှာ ဒီဇင်ဘာ ၂၃ ရက်က သေနတ်သမား ၁ ယောက်က လူ ၃ ယောက်ကိုသတ်ဖြတ်ခဲ့လို့ အနီးနားက လမ်းတွေမှာ ပြင်းထန်တဲ့ ဆန္ဒပြပွဲတွေ ညလုံးပေါက် ဖြစ်ပွားခဲ့ပါတယ်။

မွန်းလွဲပိုင်းလောက်က ပါရီမြို့တော်ရဲ့ ၁၀ ခုမြောက် ခရိုင်ရှိ ဈေးဆိုင်ငယ်တွေနဲ့ ကော်ဖီဆိုင်တွေ တန်းစီနေတဲ့ Rue d'Enghien လမ်းပေါ်မှာ သေနတ်အချက်ပေါင်းများစွာ ပစ်ခတ်ခဲ့တာပါ။

ဒီပစ်ခတ်မှုမှာ သံသယရှိသူအဖြစ် အသက် ၆၉ နှစ်အရွယ် ရထားယာဉ်မောင်းဟောင်းကို ဖမ်းဆီးထားကြောင်း အာဏာပိုင်တွေက ပြောကြားခဲ့ပါတယ်။ 

သူဟာ ပြီးခဲ့တဲ့ ၁ နှစ်က ပါရီရှိ ရွှေ့ပြောင်းအခြေချစခန်းတစ်ခုကို ဓားနဲ့တိုက်ခိုက်ခဲ့မှုအတွက် ရုံးတင်စစ်ဆေးဖို့ စောင့်ဆိုင်းနေတုန်း မကြာသေးခင်ကပဲ အကျဉ်းထောင်မှ လွတ်မြောက်လာခဲ့တာဖြစ်ကြောင်း ပါရီအစိုးရရှေ့နေက ပြောကြားခဲ့ပါတယ်။

သူဟာ ၂၀၁၆ ခုနှစ် ဇွန်လက လက်နက်ခဲယမ်းနဲ့ အကြမ်းဖက်လုပ်ရပ် ကျူးလွန်မှုနဲ့ ပြစ်ဒဏ်ချမှတ်ခံခဲ့ရပြီး အယူခံဝင်ခဲ့တာပါ။ စုံစမ်းရေးမှူးတွေဟာ ဒီပစ်ခတ်မှုအတွက် ဖြစ်နိုင်ခြေရှိတဲ့ လူမျိုးရေးခွဲခြားမှု အကြောင်းရင်းကိုလည်း စဉ်းစားနေကြပါတယ်။ 

သေဆုံးသွားသူ သုံးဦးစလုံးမှာ ကာ့ဒ်လူမျိုးများဖြစ်ကြောင်း ကာ့ဒ်ယဉ်ကျေးမှုစင်တာမှ ရှေ့နေ တစ်ဦးက ရိုက်တာသတင်းဌာနကို ပြောကြားခဲ့ပါတယ်။ တခြားသူ ၃ ယောက်လည်း ဒဏ်ရာရရှိခဲ့ပြီး သူတို့ထဲက တယောက်က  အသက်အန္တရာယ် စိုးရိမ်ရကြောင်း သိရပါတယ်။ 

ပြင်သစ်သမ္မတ မက်ခရွန်းက ပြင်သစ်နိုင်ငံမှာ ကာ့ဒ်တွေကို ပစ်မှတ်ထားပြီး ပြင်းထန်တဲ့ တိုက်ခိုက်မှုကို ရှုတ်ချခဲ့ပါတယ်။ 

ပြင်သစ်ပြည်ထဲရေးဝန်ကြီးကလည်း သံသယရှိသူဟာ နိုင်ငံခြားသားတွေကို ပစ်မှတ်ထားဖို့ ဆန္ဒရှိကြောင်း ရှင်းရှင်းလင်းလင်း ပြောကြားခဲ့ပေမယ့် ကာ့ဒ်တွေကိုပဲ ရွေးချယ် လုပ်ဆောင်တာလို့ အတိအကျသက်သေမပြနိုင်ကြောင်း ပြောကြားခဲ့ပါတယ်။

ပါရီမြို့တော်ရှိ ကာ့ဒ်လူမျိုး အသိုင်းအဝိုင်းကလည်း ပစ်ခတ်မှုဖြစ်ပွားခဲ့တဲ့ နေရာအနီးမှာ လာရောက်စုရုံးခဲ့ကြပြီး ကြွေးကြော်သံတွေနဲ့ ဆန္ဒပြခဲ့ကြပါတယ်။ 

ညရောက်လာတာနဲ့အမျှ ဆန္ဒပြမှုတွေဟာ အရှိန်တက်လာပြီး အခင်းဖြစ်ပွားရာနေရာနဲ့ မလှမ်းမကမ်းမှာ ဒေါသထွက်နေတဲ့ လူအုပ်ကြီးကို လူစုခွဲဖို့ ရဲတပ်ဖွဲ့က အမှောင်ထဲကို မျက်ရည်ယို ဗုံးတွေနဲ့ ပစ်ခတ် လူစုခွဲခဲ့ပါတယ်။ 

ရဲအရာရှိတွေဆီကိုလည်း ဆန္ဒပြသမားတွေက လက်နက်တွေ၊ အမှိုက်ပုံးတွေနဲ့ ပြန်ပစ်ပေါက်ခဲ့ကြပြီး စားသောက်ဆိုင် စားပွဲတွေလည်းမှောက်ပြီးတော့ ကားတွေလည်း ပျက်စီးခဲ့ပါတယ်။