လီဗာပူးအသင်းအနေနဲ့ မကြာခင်ကမှ အသစ်ခေါ်ယူလိုက်တဲ့ တိုက်စစ်မှူး ဂတ်ပိုကို ဘယ်နေရာမှာ ထားကစားစေမှာလဲလို့ ကစားသမားဟောင်း စတိဗ်နစ်ကိုလ်က မေးခွန်းထုတ်လိုက်ပါတယ်။

နောက်ခံလူဟောင်း နစ်ကိုလ်ဟာ ၁၉၈၀ ပြည့်နှစ်ကာလတွေမှာ လီဗာပူးအသင်းနဲ့အတူ အောင်မြင်မှုတွေ အများကြီး ရယူနိုင်ခဲ့သူပါ။

လီဗာပူးအသင်းက ဂတ်ပိုကို ခေါ်ယူနိုင်ခဲ့ပြီးနောက်မှာတော့ အသင်းရဲ့ကစားကွက်မှာ အဆင်ပြေနိုင်ဖို့မလွယ်ကြောင်း နစ်ကိုလ်က သုံးသပ်ခဲ့တာပါ။

“သူက ဘယ်နေရာမှာ ကစားမလဲ။ သူက အထောင်တိုက်စစ်မှူးနေရာ မကစားသလို ကွင်းလယ်နေရာမှာလည်း မကစားပါဘူး။ သူက တိုက်စစ်နဲ့ ကွင်းလယ်ကြားထဲမှာ ကစားတတ်တဲ့သူပါ။ လက်ရှိ လီဗာပူးကစားပုံအရဆိုရင် သူနဲ့အဆင်ပြေမယ်လို့ မထင်ပါဘူး” လို့ နစ်ကိုလ်က ပြောပါတယ်။

ဂတ်ပိုအနေနဲ့ တိုက်စစ်သုံးယောက်တန်းရဲ့ အစွန်တနေရာမှာ ကစားမယ်ဆိုရင်လည်း ခံစစ်ကို ပြန်ကူဖို့ မလွယ်တာကြောင့် အဆင်ပြေနိုင်ဖွယ်မရှိကြောင်း နစ်ကိုလ်က သုံးသပ်သွားပါတယ်။