ဧရာဝတီတိုင်း၊ ဟင်္သာတခရိုင်၊ မြန်အောင်မြို့နယ်မှာ သေနတ်ပစ်ခတ်မှုနဲ့ ဆက်နွှယ်ပြီး ဖမ်းဆီးခံထားရတဲ့ မူလတန်းပြကျောင်းဆရာ တယောက်ကို စစ်ကောင်စီ လက်အောက်ခံ ဟင်္သာတခရိုင် တရားရုံးက  ဒီဇင်ဘာ ၃၀ ရက်မှာ  သေဒဏ်ချမှတ်လိုက်တယ်လို့ ဒေသခံတွေထံက သိရပါတယ်။

သပြေကုန်းကျေးရွာမှာလူအများက စစ်ကောင်စီ သတင်းပေးလို့ သတ်မှတ်ထားတဲ့  ဝင်းညွှန့်အောင် (ခ)ဂျပ်ကြီးဟာ ၂၀၂၁ ခုနှစ် အောက်တိုဘာလမှာ ပစ်သတ်ခံရပြီးနောက်  မူလတန်းပြ ကျောင်းဆရာ ဦးကောင်းခန့်ကျော်ကို စစ်ကောင်စီက ဟင်္သာတအကျဉ်းထောင်မှာ ဖမ်းဆီးထားကာ ပုဒ်မ ၃၀၂ (၁) ခ၊ ၅၀ (စ) ပုဒ်မ စတဲ့ အကြမ်းဖက်မှု ပုဒ်မတွေနဲ့ သေဒဏ်ချမှတ်ခဲ့တာ ဖြစ်ပါတယ်။

ကျောင်းဆရာရဲ့ မိသားစုနဲ့ နီးစပ်သူတစ်ဦးက  "သပြေကုန်းက စစ်တပ် သတင်းပေးလို့ နာမည်ကြီးနေတဲ့ ဝင်းညွှန့်အောင်(ခ)ဂျပ်ကြီး  သေနတ်နဲ့ အပစ်ခံရမှုနဲ့ ပတ်သက်ပြီး အဖမ်းခံရတာ။ ဟင်္သာတထောင်ကို ပို့ထားတာ တနှစ်ကျော်ပြီ။ ဒီဇင်ဘာ ၃၀ ရက်နေ့ အားချင်းပဲ သေဒဏ်ချပြီး ပုသိမ်ထောင်ကို ပို့လိုက်တယ်။ မိသားစုဝင်တွေ အံသြနေတယ် အဲ့လောက်ဖြစ်မယ်မထင်ထားဘူး" လို့ ပြောပါတယ်။

သေဒဏ်ချ မှတ်ခံရတဲ့ မူလတန်းပြဆရာ ဦးကောင်းခန့်ကျော်ဟာ မြန်အောင်မြို့နယ် ထိပ်ပုတ်ကုန်း အထက (ခွဲ)မှာ တာဝန်ထမ်းဆောင်ခဲ့သူဖြစ်ပြီး သပြေကုန်းရွာ ဇာတိဖြစ်ပါတယ်။