အင်ဒိုနီးရှားနိုင်ငံ။ ယိုဂရာကာတာအထူးဒေသရှိ မာရားပီမီးတောင်ဟာ မတ် ၁၁ ရက်က ပေါက်ကွဲခဲ့ပြီး ကောင်းကင်ယံကို ၇ ကီလိုမီတာအထိ  ပူပြင်းတဲ့မီးခိုးလုံးတွေလွှင့်ထုတ်ခဲ့ကြောင်း နိုင်ငံရဲ့ သဘာဝဘေးအန္တရာယ် စီမံခန့်ခွဲမှုအေဂျင်စီက ထုတ်ပြန်ချက်မှာ ဖော်ပြထားပါတယ်။

မီးတောင်ပေါက်ကွဲမှုကြောင့် အနီးနားရှိ မြို့တွေပေါ် ပြာမိုးတွေ ရွာနေတဲ့ ဗီဒီယိုတွေလည်း လူမှုမီဒီယာတွေမှာ ပျံ့နှံ့နေပါတယ်။

မာရားပီမီးတောင်ဟာ ဒေသစံတော်ချိန် မွန်းလွဲ ၁၂ နာရီလောက်မှာ ပေါက်ကွဲခဲ့ပြီး ချော်ရည်တွေ ဟာ ၁ ကီလိုမီတာခွဲ အကွာအဝေးကို စီးဆင်းသွားတာကို တွေ့ရှိခဲ့ကြောင်း ဒေသဆိုင်ရာ အာဏာပိုင်တွေက ပြောကြားခဲ့ပါတယ်။

မီးတောင်ဝကနေ ၃ ကီလိုမီတာမှ ၇ ကီလိုမီတာကြား အကွာအဝေးရှိ အန္တရာယ်ဇုန်တွေမှာ လှုပ်ရှားမှုတွေကို ရပ်တန့်ထားဖို့ အနီးနားအသိုက်အဝန်းမှ ဒေသခံတွေကို သတိပေးထားကြောင်း ထုတ်ပြန်ချက်မှာ ဖော်ပြထားပါတယ်။ 

အမြင့် ၂,၉၆၃ မီတာ ရှိတဲ့ မာရားပီ မီးတောင်ဟာ အင်ဒိုနီးရှားနိုင်ငံရဲ့ အတက်ကြွဆုံး မီးတောင်တွေထဲက တစ်ခုဖြစ်ပြီး နိုင်ငံရဲ့ ဒုတိယအမြင့်ဆုံးသတိပေးချက်အဆင့်မှာ ရှိနေပါတယ်။

ပစိဖိတ်မီးကွင်းပေါ်မှာ တည်ရှိတဲ့ အင်ဒိုနီးရှားနိုင်ငံဟာ တခြားနိုင်ငံတွေထက် မီးတောင်တွေရှိတာ ပိုများပါတယ်။ 

မာရားပီ မီးတောင်ဟာ ၂၀၁၀ ခုနှစ်က နောက်ဆုံးအကြိမ် ပေါက်ကွဲခဲ့ပြီး လူပေါင်း ၃၅၀ ကျော် သေဆုံးခဲ့ပါတယ်။