ရုရှားအစိုးရဟာ ဆေးဘက်သုံး ပါးစပ်နှာခေါင်းစည်း ၁ သန်းအပါအဝင် ကိုရိုနာဗိုင်းရပ်စ် ဆိုင်ရာလူသားချင်းစာနာမှု အကူအညီတွေကို ကျူးဘားအစိုးရဆီ တင်ပို့ခဲ့တယ်လို့ ရုရှား ကာကွယ်ရေးဝန်ကြီးဌာနက ဇူလိုင် ၂၄ ရက်မှာ ပြောပါတယ်။

 သမ္မတ ဗလာဒီမီယာ ပူတင်က ဒီအထောက်အပံ့အတွက် ညွှန်ကြားချက် ပေးခဲ့တာလို့လည်း ဆိုပါတယ်။ 

စားနပ်ရိက္ခာနဲ့ ဆေးရုံသုံး ပါးစပ်နှာခေါင်းစည်း ၁ သန်းပါတဲ့ တကိုယ်တော် ကာကွယ်ရေး ပစ္စည်းတွေအပါအဝင် အကူအညီ ၈၈ တန်ကို တင်ဆောင်ထားတဲ့ စစ်လေယာဉ် ၂ စီးဟာ မော်စကို မြို့တော်နားက လေယာဉ်ကွင်းကနေ ပျံသန်း ထွက်ခွာသွားပြီလို့ ရုရှားကာကွယ်ရေးဝန်ကြီးဌာနက ကြေညာချက် ထုတ်ပြန်ပါတယ်။

ရုရှားပြည်ထောင်စုတပ်မတော်ရဲ့ ကာကွယ်ရေးဦးစီးချုပ် ဗလာဒီမီယာ ပူတင်ရဲ့ ညွှန်ကြားချက်တွေနဲ့အညီ စစ်တပ် သယ်ယူပို့ဆောင်ရေး လေယာဉ်တွေဟာ လူသားချင်း စာနာမှု အကူအညီတွေကို ကျူးဘားပြည်သူ့သမ္မတနိုင်ငံဆီ သယ်ပို့ပေးနေတယ်လို့ ဝန်ကြီးဌာနက ပြောပါတယ်။

  မနှစ်က ကိုရိုနာဗိုင်းရပ်စ် ကူးစက်မှု နိမ့်ခဲ့တဲ့ ကျူးဘားမှာ ဒီသီတင်းပတ် အစောပိုင်းက လက်တင် အမေရိကတလွှား လူဦးရေနဲ့ နှိုင်းယှဉ်ရင် ကူးစက်မှု အမြင့်ဆုံး ဖြစ်ခဲ့တယ်လို့ အစီရင်ခံ ထားပါတယ်။

 ကျန်းမာရေးစောင့်ရှောက်မှုကဏ္ဍ ဒဏ်ပိခဲ့ပြီး ဒီလအစောပိုင်း မှာတော့ အစိုးရ ဆန့်ကျင်ရေး ဆန္ဒပြပွဲတွေ ရှားရှားပါးပါး ပေါ်ပေါက်ခဲ့ပါတယ်။

 လူဦးရေ ၁၁ သန်းရှိတဲ့ ကျူးဘားနိုင်ငံမှာ အရင်အပတ်က လူဦးရေ ၁ သန်းမှာ ကူးစက်ခံ အတည်ပြုလူနာဦးရေ ၄၀၀၀ လောက် ရှိခဲ့ပြီး ကမ္ဘာ့ပျမ်းမျှ ကူးစက်နှုန်းထက် ကိုးဆ ပိုများခဲ့ တာပါ။

ပိုပြီး ကူးစက်မြန်တဲ့ ဒယ်လ်တာ ဗီဇမျိုးကွဲက ကျူးဘားနိုင်ငံကို ရောက်ရှိ ကူးစက်နေလို့ ကူးစက်နှုန်း ပိုများနေတာလို့ ရိုက်တာသတင်းဌာနက ဖော်ပြပါတယ်။