ပုပ်ရဟန်းမင်းကြီး ဖရန်စစ်ဟာ လူ ၇၂ ယောက် သေဆုံးခဲ့ပြီးဖြစ်တဲ့ တိုင်ဖွန်းမုန်တိုင်းသင့် ဖိလစ်ပိုင် ပြည်သူတွေအတွက် ဒီဇင်ဘာ ၁၉ ရက်မှာ ဆုတောင်းပေးခဲ့ပါတယ်။

တိုင်ဖွန်း ရိုင်းဟာ ဒီဇင်ဘာ ၁၆ နဲ့ ၁၇ ရက်တွေမှာ ဖိလစ်ပိုင်နိုင်ငံကို ဒီနှစ်အတွင်း အားအပြင်းဆုံး မုန်တိုင်းအဖြစ် ဝင်ရောက်တိုက်ခတ်ခဲ့ပါတယ်။ အဲဒီနောက် ဒီဇင်ဘာ ၁၉ ရက်ကစပြီး ဖိလစ်ပိုင် အာဏာပိုင်တွေက ကယ်ဆယ်ရေးလုပ်ငန်းတွေ အားဖြည့်ဆောင်ရွက်နေပါတယ်။

မုန်တိုင်းကြောင့် လူ ၄ သိန်းကျော် ဘေးကင်းရာ ရွှေ့ပြောင်းခဲ့ရသလို အိမ်တွေ ပျက်စီးခဲ့ပြီး လျှပ်စစ်ဓာတ်အားပေးလိုင်းတွေနဲ့ ဆက်သွယ်ရေးလိုင်းတွေ ပြိုကျခဲ့ပါတယ်။

အိမ်အများအပြားကို ဖျက်ဆီးခဲ့တဲ့ မုန်တိုင်းဒဏ်သင့် ဖိလစ်ပိုင် ပြည်သူတွေနဲ့ နီးနီးကပ်ကပ် ခံစားရပါတယ်လို့ စိန့်ပီတာရင်ပြင်မှာ အပတ်စဉ် ဆုတောင်းဖို့ ရောက်လာတဲ့ လူစုလူဝေးကို ပုပ်ရဟန်းမင်းကြီးက ပြောပါတယ်။

ဖိလစ်ပိုင်မှာ နှစ်စဉ် အပူပိုင်းမုန်တိုင်း အလုံး ၂၀ လောက် ဝင်ရောက်တိုက်ခတ်လေ့ရှိပြီး ရေကြီး မြေပြိုတာတွေ ဖြစ်လေ့ရှိပါတယ်။