မွန်ပြည်နယ်၊ သထုံမြို့နယ်၊ ကမာစိုင်ကျေးရွာရှိ ရန်ကုန်-မော်လမြိုင်ကားလမ်းပေါ်မှာ ဖေဖော်ဝါရီ ၇ ရက် ည ၁၁ နာရီလောက်က  အင်အား ၆  စီးပါ စစ်ကောင်စီယာဉ်တန်း တိုက်ခိုက်ခံခဲ့ရတယ်လို့ KNU တပ်မဟာ(၁) တာဝန်ရှိသူတွေနဲ့ ဒေသခံတွေက ပြောပါတယ်။

ဘီးလင်းကနေ သထုံမြို့နယ်အတွင်းကို ဝင်ရောက်လာတဲ့ စစ်ကောင်စီယာဉ်တန်းကို ကရင်အမျိုးသား လွတ်မြောက်ရေးတပ်မတော် KNLA တပ်မဟာ(၁) ၊ တပ်ရင်း (၂)နဲ့ PDF ပူးပေါင်းအဖွဲ့က မိုင်းဆွဲတိုက်ခိုက်ပြီးနောက် RPG နဲ့ ထပ်မံ ပစ်ခတ်ခဲ့တာပါ။

အဲဒီတိုက်ခိုက်မှုကြောင့် စစ်ကောင်စီဘက်က အထိအခိုက် အကျအဆုံးများနိုင်ကြောင်းနဲ့ ပစ်ခတ်တိုက်ခိုက်ရပြီးနောက် ပျက်စီးသွားတဲ့ ကား ၄ စီးကိုလည်း လက်ရှိအချိန်ထိ စစ်ကောင်စီဘက် လာရောက် သယ်ဆောင်တာ မရှိသေးဘူးလို့ KUN တပ်မဟာ(၁) သထုံခရိုင် တာဝန်ရှိသူက ပြောပါတယ်။

ဒါ့အပြင် ပစ်ခတ်တိုက်ခိုက်ခံရပြီးနောက် ညတွင်းမှာပဲ စစ်ကောင်စီက ထိခိုက်ဒဏ်ရာရတဲ့ တပ်သားတွေကို လူမှုကယ်ဆယ်ရေးကား ၂ စီးနဲ့ လာရောက် တင်ဆောင်သွားပြီး ထိခိုက်ကျဆုံးအခြေအနေ အသေးစိတ်ကို မသိရသေးဘူးလို့ ဆိုပါတယ်။

ဒေသခံတွေအဆိုအရ အဲဒီတိုက်ခိုက်မှုကြောင့် စစ်ကောင်စီဘက်က အယောက် ၃၀ နီးပါး ထိခိုက်ဒဏ်ရာရနိုင်ပြီး သေဆုံးသူ များနိုင်တယ်လို့ခန့်မှန်းပြောပေမဲ့ သီးခြားအတည်ပြုနိုင်ခြင်းတော့ မရှိသေးပါဘူး။

စစ်ကောင်စီယာဉ်တန်း မိုင်းဆွဲတိုက်ခိုက်ခံရပြီးနောက် စစ်ကောင်စီဘက်က ပစ်ခတ်ခဲ့တာကြောင့် ကမာစိုင်ကျေးရွာက နေအိမ် ၃ လုံးထက်မနည်း ကျဉ်ထိမှန်ခဲ့ပါတယ်။

ကရင်အမျိုးသားအစည်းအရုံး KNU တပ်မဟာ(၁) ထိန်းချုပ်နယ်မြေ သထုံခရိုင်မှာတော့ KNLA နဲ့ စစ်ကောင်စီတပ်တို့ မကြာခဏဆိုသလို တိုက်ပွဲဖြစ်ပွားနေပြီး၊ အခုအခါမှာလည်း နှစ်ဖက် စစ်ရေးတင်းမာနေတာပါ။